भक्तपुर, २९ असार २०८०देश बिग्रिएको भन्दै सामाजिक संजालमा उफ्रनेहरु देशको लागि सिन्को समेत भाच्दैनन । नेताहरुलाई गाली गरेरै राष्ट्रवादी बन्ने पछिल्लो ट्रेन्डले राष्ट्रप्रेमलाई नै गिज्याइरहेको देखिन्छ ।
राष्ट्रको लागि केही काम नगर्ने र गफै गरेको भरमा आफूलाई देशभक्त देखाउन खोज्नेहरुलाई चुनौती दिंदै भक्तपुरबाट भने ‘राष्ट्रको लागि २ घण्टा अभियान’ शुरु भएको छ । आफ्नो निजी जीवनको कम्तिमा २ घण्टा देशको लागि समर्पण गर्ने सोचका साथ् राष्ट्रप्रेमी अभियन्ताहरुले ‘राष्ट्रको लागि २ घण्टा’ अभियान शुरु गरेका हुन् ।
हप्तामा कम्तिमा दुई घण्टा राष्ट्रको लागि स्वयंसेवा गर्ने उदेश्यले संचालित ‘राष्ट्रको लागि २ घण्टा अभियान’ को लोकप्रियता बिस्तारै बढ्न थालेको छ । सीमित अभियन्ताहरु मिलेर शुरु गरेको यस अभियानमा छोटो समयमा नै धेरै स्वयंसेवकहरु जोडिन थालेका छन् ।
अभियानले १८ हप्ताको कार्यक्रम उत्साहजनक रुपमा सम्पन्न गरेको छ । विशेषगरी सरसफाई र हरियाली प्रवर्द्धनमा स्वयंसेवक भएर राष्ट्रप्रेमी युवा, विद्यार्थी, बुद्धिजीवी र सामजसेवीहरुले अभियानलाई अघि बढाइरहेका अभियन्ता एवं राष्ट्रको लागि २ घण्टा अभियान’ का उपाध्यक्ष नरेश रन्जितले जनाएका छन् । दुई अंक बाट शुरु भएको स्वयंसेवकको संख्या १८ हप्तामा आइपुग्दा ४ अंकमा पुगेको उनको भनाई छ ।
अभियानकर्मीको सहभागिताले अभियन्ताहरु उत्साहित बनेका छन् । १९ औं हप्तामा अरनिको राजमार्गमा वृक्षारोपण गर्ने बृहत कार्यक्रम आयोजना गरिएको उपाध्यक्ष नरेश रन्जितले बताए । ‘शनिवार बिहान ७ बजे राधेराधे बाट हामी राजमार्गमा वृक्षारोपण कार्यक्रम शुरु गर्छौं ‘ उनले भने । यसले हरियाली प्रवर्द्धन, स्वच्छ वायू र भक्तपुरको सौन्दर्यकरणमा सहयोग पुग्ने अभियानले बिश्वास लिएको उपाध्यक्ष रन्जितले बताएका छन् ।
‘राष्ट्रको लागि २ घण्टा अभियान’ शुद्ध सामाजिक अभियान भएको अभियन्ता एवं अध्यक्ष मधु ढुंगेलले प्रष्ट पारे । राजनीतिकर्मीहरू समेत अभियानमा सामेल हुँदा राजनीतिको झोला फ्याकेर बिशुद्ध अभियन्ता बनेर आउनेगरेका उनको जिकिर छ ।
हुनपनि अभियान शुरु भएदेखि यसमा सक्रिय अभियन्ता निवर्तमान प्रदेश सांसद प्रतिमा श्रेष्ठ त्यसैगरी मध्यपुर थिमीकी निवर्तमान उपमेयर अञ्जनादेवी मधिकर्मी र सूर्यविनायक नगरपालिकाकी निवर्तमान उपमेयर जुना बस्नेत यसको उदाहरण हुन् । फरक राजनीतिक पृष्ठभूमि भएपनि उनीहरु अभियानमा उत्तिकै सक्रिय छन् ।
अरुको मुख नताकी आफैबाट देशको लागि जे सकिन्छ त्यो गर्ने अभियानकर्मीहरुको उत्साह तारिफयोग्य रहेको बागमती प्रदेश सरकारका प्रमुख राजनीतिक सल्लाहकार डिपी ढकाल बताउँछन ।
राष्ट्रको लागि केही काम गर्नैपर्ने अठोट बोकेको सामाजिक अभियानलाई सबैले सहयोग गर्नुपर्ने उनको बुझाइ छ । यसै अभियानको माग बमोजिक बागमती प्रदेश सरकारको नीति तथा कार्यक्रम र बजेटमा गणेशमान सरसफाई कार्यक्रम समेटिएको समेत उनले खुलासा गरे ।
गरे के सकिदैन, शुरु भएको १८ हप्तामै यस अभियानले अरनिको राजमार्ग लगायत वरपरको फोहोर सफा गरी सरसफाईमा जोड दिएको छ । राजमार्गले शहरको परिचय दिने भएकाले सभ्य र सुन्दर भक्तपुरको चित्र देशबासीलाई दिन अभियान सक्रियतापूर्वक लागेकै छ । त्यतिमात्र होइन, प्रदेश सरकार र स्थानीय सरकारलाई सरसफाई नीति र कार्यक्रम बनाउन पनि यस अभियानले उल्लेखनीय भूमिका निर्वाह गर्न सक्षम देखिएको छ । यस्तै सक्रिय अभियान सबैतिर शुरु भए देश बन्न बेर लाग्ने छैन भन्ने संदेश समेत राष्ट्रको लागि २ घण्टा’ अभियानले प्रवाह गर्न सफल भएको देखिन्छ ।