भक्तपुरको चाँगुनारायणमा चाँगुनारायण सिटी, एभोकाडो सिटी अभियान शुरु हुने भएको छ । आइतवार एक औपचारिक कार्यक्रमका बीच बिहान ११ बजे तपा दम्फो (हेल्मेट डाडा)मा अभियान शुभारम्भ हुने भएको हो ।

अभियानले चाँगुनारायण नगरभित्र प्रत्येक घरपरिवारलाई एभोकाडो फलको बिरुवा लगाउन प्रेरित गर्ने र प्रति घर २ वटा बिरुवा समेत नि:शुल्क प्रदान गर्ने लक्ष लिएको अभियानका संयोजक नरेश खड्काले जनाएका छन् । ‘यस अभियानलाई ३ वर्ष सम्म संचालन गरी चाँगुनारायण सिटीलाई एवोकाडो सिटीको पहिचान दिने हाम्रो प्रयास रहनेछ ।’ संयोजक खड्काले भने ।

यस अभियानका परिकल्पनाकार भने बागमती प्रदेश सरकारको मूख्यमन्त्रीका प्रमुख राजनीतिक सल्लाहकार एवं बौद्धिक नेता डिपी ढकाल रहेका संयोजक खड्काले बताए । अर्थशास्त्रका ज्ञाता समेत रहेका ढकालले चाँगुनारायणका स्थानीयको आय आर्जन बढाउँन यस्तो योजना अघि सारेपछि यसलाई अभियानकै रुपमा संचालन गर्न लागिएको उनले बताए । अर्थ राजनीतिका पुस्तक समेत लेखेका नेता ढकाल अभियानको मुख्य संरक्षक रहने बताइएको छ ।

नेकपा(माओवादी केन्द्र)का केन्द्रीय सदस्य समेत रहेका नेता ढकालले अभियान कुनै एक राजनीतिक पार्टीको मात्र पूँजी नहुने बताए । आफू राजनीतिकर्मीका अलावा चाँगुनारायणबासी पनि भएको भन्दै उनले अभियान जनस्तरमा सबै स्थानीयको सहभागिता र पहुँचमा संचालन हुने विश्वास व्यक्त गरेका छन् ।

के हो एभोकाडो
नेपालमा सोखले रोपिने एभोकाडो एक मीठो र महँगो घिउफल हो । केही वर्ष यता यसलाई व्यवसायिक रुपले रोपिने क्रम बढ्न थालेको छ ।

प्रशस्त भिटामिन, प्रोटिन र चिल्लो पदार्थ पाइने एभोकाडोको माग नेपालमा बढ्दै गएको छ भने विदेश समेत निर्यात गर्न सकिने भएकोले बजार नपाउने समस्या छैन । एभोकाडोको एउटा बोटले तीन क्विन्टलसम्म फल दिने र वार्षिक पचास हजार सम्म आम्दानी हुने बताइन्छ ।

एभोकाडोको बोट मद्यम उचाइको हुने र सदाबहार हरियो रहने हुँदा यसले घर र शहरको सौन्दर्य बढाउँन, स्वच्छ वायु प्रवाह गर्न र वातावरण जोगाउन समेत मद्दत गर्दछ ।