भक्तपुर, १० साउन २०८०राजस्व अनुसन्धान विभागले सोह्रखुट्टेस्थित ‘रेडी ट्रेड प्राली’को गोदाममा छापा मारेको छ । एक साता अघि त्रिभुवन विमानस्थल बाट समातिएको सुनको अनुसन्धान गरिरहेको विभागले गोदाममा छापा मारेको हो ।
गोदामबाट मोटरसाइकल र स्कुटरमा लाग्ने थप ब्रेक प्याड बरामद गरिएको बताइएको छ । ५५ बाकस ब्रेक प्याड बरामद गरिएको अनुसन्धानमा संलग्न एक अधिकृतले बताए । बरामद भएको सुन हङकङबाट ‘रेडी ट्रेड प्राली’ ले मगाएको देखिएकाले विभागको टोली गोदाममा पुगेको हो । पक्राउ परेकाहरुको बयान अनुसार सुन तस्करले सो गोदाममा सुन ल्याएर निकाल्ने र ‘रि–प्याक’ गर्ने गरेका थिए ।
बुधवार नै सुन प्रकरणमा राजस्वले व्यापारी राकेश कुमार अडुकियाको घरमा छापा हानेको छ । विभागको टोलीले कमलपोखरीस्थित उनको घरमा छापा मारेको हो ।
त्रिभुवन अन्तर्राष्ट्रिय विमानस्थलको भन्सारबाट जाँचपास भएर निस्किएका करिब १ सय किलो सुन बरामद भएको घटनामा अनुसन्धान गर्ने क्रममा विभागको टोली उनको घरमा पुगेको हो।
यस प्रकरणमा विभागले हाल सम्म १६ जनालाई पक्राउ गरिसकेको छ।