भक्तपुर, १६ साउन २०८०भक्तपुरको नगरकोट र आसपासको क्षेत्रमा भारी वर्षा भएपछि बाढी र पहिरोको जोखिम बढेको छ । गए राति १ बजे सम्ममा नै सो क्षेत्रमा भारी वर्षा मापन भएपछि जोखिम बढेको हो ।
जल तथा मौसम विज्ञान विभागले नगरकोट र आसपासको क्षेत्रमा भारी वर्षा मापन भएको जनाएको छ । नगरकोटको जलमापन केन्द्रले सो क्षेत्रमा भारी वर्षा मापन गरेपछि मोबाइलमा संदेश नै पठाएर विभागले सतर्क समेत गराएको छ । विभागले राति सवा १ बजे नै मोबाइल संदेश पठाएर सतर्क गराएको हो ।
‘नगरकोट र आसपासको क्षेत्र भई बहने ससाना खोला खोल्साको बहाब बढ्न सक्ने र कमजोर भिरालो जमिनमा पहिरो खस्न सक्ने जोखिम रहेकाले सतर्कता अपनाऔं ।’ संदेशमा भनिएको छ ।
भक्तपुरको जिल्ला प्रशासन कार्यालयले संभावित बिपतलाई ध्यान दिई उद्धार टोलीलाई एलर्ट अवस्थामा राखिएको जनाएको छ । भक्तपुरका सहायक सिडिओ डोरेन्द्रप्रसाद निरौलाले पछिल्लो समय वर्षाका कारण जोखिम बढेकाले नगरकोट आवतजावत गर्दा सतर्क रहन आग्रह गरेका छन् ।