भक्तपुर, २८ साउन २०८० नेपाली कांग्रेसको भक्तपुरमा कुनै गुटउपगुट नरहेको जिल्ला सभापति दुर्लभ थापाले जानकारी गराएका छन् । केन्द्रमा पनि नेताको चाकडी र चाप्लुसी गर्दै हिड्ने स्वार्थी समुहले मात्र गुटउपगुटको हल्ला फैलाएको उनको भनाइ छ ।
सूर्यविनायक नगर समितिको बैठकमा सभापति थापाले गुटउपगुटको कुरा गर्ने नेता कार्यकर्ता सच्चा कांग्रेस हुन नसक्ने बताउदै सचेत गराएका नगर प्रवक्ता रमेश खड्काले जनाएका छन् । प्रतिनिधि सभा सदस्य समेत रहेका सभापति थापाले जनतामा केन्द्रीत भएर कामहरु गर्न निर्देशन समेत दिएका बताइएको छ ।
“गुटउपगुटको कुरा गर्नेलाई वडा देखि तह लगाउने काम गर्नुस्, पार्टी सभापति तपाईको साथमा हुन्छ ।” सभापति थापाले भने । आफू सदैव ईमान्दार कार्यकर्ताको पक्षमा रहने भन्दै कसैले यसैलाई गुट भन्ने ठाने ठिक नहुने उनले चेतावनी पनि दिएका छन् । नेताको दैलो चहार्दै चाकडीचाप्लुसी गर्ने युग अन्त्य भएको भन्दै उनले नेतासंग रोएर नभई जनतासंग भिजेर मात्र कांग्रेसको नेतृत्व प्राप्त हुने प्रष्ट पारे ।
बैठकमा सभापति थापाले केन्द्र, प्रदेश र जिल्लाबाट बिशेष आन्तरिक अभियानका लागि आएका नेताहरूलाई सहयोग गरेर अभियानलाई सफल पार्न सूर्यविनायक नगर समितिलाई निर्देशन दिएका र भदौ १६ मा गर्ने तय भएको नगर सम्मेलन तयारीबारे जानकारी लिएका नगर प्रवक्ता खड्काले बताएका छन् ।