योङ्ग कम्युनिष्ट लिग, नेपाल (वाइसीएल नेपाल) का केन्द्रीय सदस्य एवं भक्तपुर जिल्ला इन्चार्ज नरेश रन्जितले सांसद सुनिल शर्मालाई मनोहरा खोला कटेर भक्तपुर नआउन चेतावनी दिएका छन् ।

प्रहरीले नक्कली शैक्षिक प्रमाणपत्रको अनुसन्धान थालेपछि आत्तिएका मेडिकल कलेज संचालक समेत रहेका सांसद शर्माले प्रधानमन्त्री र गृहमन्त्रीमाथि संसदमै खराब टिप्पणी गरेपछि वाइसीएलका इन्चार्ज रन्जित आक्रोशित भएका हुन् ।

वाइसीएल इन्चार्ज रन्जितले क्रान्तिका नायक र सुशासनका पहलकर्ता प्रधानमन्त्री प्रचण्ड र गृहमन्त्री नारायणकाजी श्रेष्ठ प्रकाशको पक्षमा देशका परिवर्तनकारी युवाशक्ति रहेको उल्लेख गर्दै भक्तपुरका कुनै भगवानले शर्मालाई बचाउन नसक्ने बताएका छन् । ” मेडिकल माफिया सुनिल शर्मालाई भक्तपुरका उनका भगवानले बचाउन सक्दैनन्, मनहरा खोला कटेर भक्तपुर प्रवेश नगर्न खबरदारी गर्दछौं ।” उनले भनेका छन् ।

सुशासनका गफ दिनेहरुले सरकारको काममा हलो अड्काएको दुनियाँले देखिरहेकाले युवाले त्यसको हिसाबकिताब गर्ने चेतावनी समेत उनले दिएका छन् । भक्तपुर वाइसीएलले स्थानीय तहको र भक्तपुरमा रहेर भैरहेको सबैखाले भ्रष्टाचारको भन्डाफोर गर्ने उनको भनाइ छ । जिल्ला र स्थानीय तहका भ्रष्टाचारका फाइल खोल्न समेत वाइसीएलले सहयोग गर्ने इन्चार्ज रन्जितले उल्लेख गरेका छन् ।