भक्तपुर, २० भदौ २०८०कान्ति बाल अस्पतालको इमर्जेन्सी कक्षमा पुर्याइएकी एक बालिकाले पालो पर्खदापर्खदै ज्यान गुमाउनु परेको समाचार सार्वजनिक भएपछि छानबिन गर्न समिति गठन भएको छ । उपचार नपाएर बालिकाको मृत्यु भएको समाचार मिडियामा सार्वजनिक भएपछि अस्पताल प्रशासनले छानबिन समिति बनाएको हो ।
अस्पतालका निर्देशक डा. पंकज रायले प्रकाश जोशीको संयोजकत्वमा बुधबार तीन सदस्यीय छानबिन समिति बनाएका हुन् । समितिमा नर्सिङ अधिकृत अजिता सिलवाल सदस्य र शाखा अधिकृत डमरु दाहाल सदस्य सचिव रहेका छन् । समितिलाई घटनाबारे सत्यतथ्य पत्ता लगाई प्रतिवेदन पेस गर्न पाँच दिनको समय दिइएको छ ।
मकवानपुरको थाहा नगरपालिका भर भै काठमाडौंको बाफल बस्ने पाँच वर्षीया बालिका रेजिशा गोपालीको सोमबार साँझ उपचार नपाएर ज्यान गएको थियो । रेजिशालाई उच्च ज्वरो आएपछि आमा रिता गोपाली र हजुरबा कृष्णबहादुर गोपालीले सोमबार साँझ ५ बजे कान्तिको इमर्जेन्सी कक्षमा पुर्याए पनि ७ बजेसम्म उपचारको पालो नआएपछि उनको मृत्यु भएको थियो ।
यो समाचार बाहिरीए संगै अस्पतालको लापरवाहीको विषय लाई लिएर देशभरका मानिस दुखी भएका छन् । प्रधानमन्त्री पुष्पकमल दाहाल प्रचण्डले यस्ता घटनाले राज्यप्रति बितृष्णा बढाउने बताउदै समाचारमा भनिए जस्तै उपचार नगरिएको भए दोषी उपर कडा कारवाही गर्न निर्देशन दिएका छन् ।
