भक्तपुर, २२ भदौ २०८०भक्तपुरको अरनिको राजमार्ग अन्तर्गत सूर्यविनायक-८ जगातीनजिक आदर्शमा मोटरसाइकल एक आपसमा ठोक्किदा पछाडि सवार एक युवतीको ज्यान गएको छ भने दुबै सवारी चालक घाइते भएका छन् । दुर्घटना शुक्रवार राती करिब पौने ८ बजे भएको हो ।
ज्यान गुमाउनेमा काभ्रेको बनेपा नगरपालिका २ घिमिरेगाउँ बस्ने वर्ष २५ की नविना काफ्ले घिमिरे रहेकी छन् । उनको घटनास्थलमा नै मृत्यु भएको प्रहरीको भनाइ छ ।
नविना सूर्यविनायकबाट जाँदै गरेको प्रदेश नं ३ –०२–००२प ६९३ नं को मोटरसाइकलमा सवार थिइन् । सूर्यविनायक तर्फ आउदै गरेको बाग्मती प्रदेश –०२–०२३ प २८५९ नं को मोटरसाइकल र उनी सवार मोटरसाइकल ठोक्किदा मोटरसाइकल अनियन्त्रित भई सुर्यविनायक बाट जागाती तर्फ जादै गरेको बाग्मती प्रदेश ०३–००१ ख २४११ नं को टेलर गाडीमा समेत ठक्कर खाई दुर्घटना भएको थियो ।
उक्त मोटरसाइकल चालक वर्ष ३० को किरण घिमिरे घाइते भएका छन् भने अर्को मोटरसाइकलका चालक ओखल ढुंगाको सुनकोशी गापा ४ घर भई हाल नलिनचोक बस्ने वृत जनसेवा दरबन्दी भएका वर्ष ३२ को प्रहरी जवान हिरा बडाल पनि घाइते छन । घाइते दुबैको उपचार भैरहेको र चिन्ताजनक अवस्था नरहेको प्रहरीको भनाइ छ ।
टेलर चालक विरगन्ज २ बस्ने वर्ष २५ को हासिब हुसेन अन्सारी वृत जगातीको नियन्त्रणमा रहेका छन् । घटनाको थप अनुसन्धान भैरहेको बताइएको छ ।