भक्तपुर, ११ असोज २०८०भक्तपुरको चाँगुनारायण ९ ताथलीमा बिहीबारबाट सुरु हुने श्रीमदभागवत विराट पितृ मुक्ति ज्ञान महायज्ञको तयारी सम्पन्न गरिएको छ ।
कार्यक्रम स्थल दुलही झैँ सिङ्गारिएको छ । जताततै ध्वजापत्तका र पण्डलले सजाइएको छ भने कार्यक्रम स्थलको टाढा टाढा सम्म स्वागत द्वार बनाइएको छ ।
अरनिको राजमार्गमा रहेको जगातीबाट स्वागतद्वार पछ्याउदै जाँदा ताथलीको नालाछाप स्थित महायज्ञ स्थल सहजै पुग्न सकिने देखिन्छ ।
छोरीको घर ज्येष्ठ नागरिक आश्रम निर्माणको सहयोगार्थ आयोजना गरिएको श्रीमदभागवत विराट पितृ मुक्ति ज्ञान महायज्ञको तयारी हेर्दा नै भक्तजनहरु मुग्ध बनेका छन् । महायज्ञको शृंगारले भक्तजन मात्र होइन, टिकटक चलाउनेहरु पनि तानिएका देखिन्छन् ।
चर्चित श्रीमदभागवत कथाबाचक बालयोगेश्वर विजयमूर्ति महाराजको नेतृत्वमा बिहीवार बाट शुरु हुने महायज्ञ १७ दिन सम्म चल्ने कार्यक्रम छ । कथाबाचन चर्चित महिला पण्डित गरिमा उपाध्याय र उमा महेश्वरीले गर्ने बताइएको छ । बिहीबार विहान ७ बजे १००८ शान्ति कलश यात्रा गरी दिउँसो १ बजे उद्घाटनको तयारी आयोजकले गरेको छ ।
महायज्ञका अवसरमा ५ सय भन्दा बढी बाल कन्याहरुको पुजन गरिने, सयौ जनाको सामूहिक तुलादान, १०८ गौमाताको दुध जम्मा गरी पञ्चामृत तयार गरी वितरण गर्ने, १ हजार भन्दा बढी ज्येष्ठ नागरिकलाई सम्मान गर्ने, चारवेद, पुराण पाठ पारायण सहित सम्पूर्ण अध्यात्मिक गतिविधि हुने जानकारी गराइएको छ ।
यसैगरी प्रत्येक दिन राष्ट्रिय स्तरका राजनेता र कलाकारहरुको उपस्थिती, रात्रीको समयमा रामलीला, कृष्णलीला, भरत नाट्यम, नृत्य, धर्म संस्कृति र पहिचान झल्कने साँसकृतिक झाकी, देश विदेशका ख्याती प्राप्त सन्त, महात्मा, धर्मगुरुहरुको उपस्थिती र प्रवचन हुने आयोजकको भनाइ छ ।