भक्तपुर, १७ असोज २०८०हत्या अपराधमा अदालतबाट जन्मकैदको सजाय पाएका रिगल भनिने योगराज ढकाललाई आममाफी दिइएपछि पीडित परिवार विक्षिप्त बनेको छ । ढकालले हत्या गरेका चेतन मानन्धरकी पत्नी भारती मानन्धरले आममाफी बिरुद्ध अनसन शुरु गरेकी छन् ।
संविधान दिवसका दिन रिगललाई कैद मिनाहा दिने राष्ट्रपतिको घोषणाविरुद्ध सर्वोच्च अदालतमा रिटसमेत दिएकी भारतीले बुधवार बाट राजधानीको माइतीघर मण्डलामा अनसन शुरु गरेकी हुन् ।
आफ्ना श्रीमान् चेतन मानन्धरको हत्या गर्ने योगराज ढकाल (रिगल)लाई सरकारले दिएको आममाफी खारेज गर्नुपर्ने र उनलाई पुन: जेल हाल्नुपर्ने भारतीको भनाइ छ । उनले आफुले न्याय नपाएसम्म अनसन नछोड्ने बताएकी छन् ।
२०७२ साल असार २८ गते बाके जिल्लाको नेपालगञ्जस्थित धम्बोजी चोकमा दिनदहाडै चेतन मानन्धरमाथि खुँडा प्रहार गरी हत्या गरेको अभियोग पुष्टि गर्दै अदालतले रिगललाई जन्मकैदको सजाय सुनाएको थियो । ४० प्रतिसत सजाय काटेपछि सरकारको सिफारिसमा राष्ट्रपतिले उनलाई संविधान दिवसको दिन बाँकी कैद मिनाहको घोषणा गरेका थिए । उनी विजय भावमा तामझाम सहित रिहा भएपछि सर्वत्र आलोचना भएको थियो ।
रिगल अपराध गर्दा तरुण दलमा आवद्ध थिए । दलीय संरक्षणमा उनलाई अपराध गर्दा पनि उन्मुक्ति मिलेको आशंका गरिएको छ ।