भक्तपुर, १७ असोज २०८०वडादशैको बिजया दशमीको दिन ठुलो जात्रा लाग्ने भक्तपुर ९ च्याम्हसिंह स्थित प्रसिद्ध ब्रम्हायणी मन्दिर परिसरको सरसफाईमा प्रतिष्पर्धा देखिएको छ । नेकपा(माओवादी केन्द्र) को जनतासंग माओवादी विशेष रुपान्तरण अभियान अन्तर्गत सार्वजनिक गरिएको सरसफाई कार्यक्रमलाई पछि पार्दै वडा कार्यालयले सरसफाई कार्यक्रम गर्ने भएको हो ।
माओवादी केन्द्रको सहायक संगठन वाइसिएलको भक्तपुर नगर समितिले शनिवार बिहान ७ बजेको लागि भक्तपुर ९ स्थित ब्रम्हायणी मन्दिर परिसरको बृहत सरसफाई कार्यक्रम सार्वजनिक गरेको थियो । सोही कार्यक्रम सरकारी स्तरमै वडा नम्बर ९ को कार्यालयले शुक्रवार बिहान ७ बजे तय गरेर सहभागीताका लागि पत्राचार समेत गरेको छ ।
वडा कार्यालयका सचिव पुन्यराम लाखाले वडाध्यक्ष रविन्द्र ज्याख्वको अध्यक्षतामा बसेको बैठकले हरेक वर्ष जस्तै जनस्तर बाटै यस वर्ष पनि ब्रम्हायणी मन्दिर परिसरको बृहत सरसफाई कार्यक्रम गर्ने निर्णय गरिएकाले शुक्रवार बिहान ७ बजे सहभागिताका लागि पत्राचार गरिएको बताएका छन् । बिजया दशमीका दिन जात्रा लाग्ने प्रसिद्ध ब्रम्हायणी मन्दिरमा बृहत सरसफाई गर्ने काम हरेक वर्ष वडाले आयोजना गर्दै आएको र यसमा सबै स्थानीयको सक्रिय सहभागिता रहने गरेको उनको भनाइ छ ।
शनिवारका लागि सरसफाई कार्यक्रम आयोजना गरेको भक्तपुर वाइसिएलका अध्यक्ष राज वाङ्गयोले आफूहरुको निर्धारित कार्यक्रमलाई वडाको कार्यक्रमले सहयोग नै पुर्याउने बताए । पूर्वनिर्धारित कार्यक्रम नरोकिने भन्दै उनले सहभागि भै दिन आग्रह समेत गरेका छन् । माओवादी केन्द्रका नगर अध्यक्ष राकेश सुवालले वडा कार्यालय र आफ्नो पार्टीको उदेश्य सरसफाई नै भएकोले यसले ब्रम्हायणी मन्दिरलाई सफा राख्न थप मद्दत पुर्याउने बिश्वास व्यक्त गरेका छन् । आफूहरु अघिल्लो दिन वडाको सरसफाई कार्यक्रममा समेत सहभागी हुने र शनिवार पूर्वनिर्धारित कार्यक्रम पनि सम्पन्न गर्ने उनले बताए । जात्राको भोलिपल्ट पनि सरसफाई गरी मन्दिर परिसर सफा राख्ने अध्यक्ष सुवालको भनाइ छ ।
भक्तपुर ९ च्याम्हसिंह स्थित प्रसिद्ध ब्रम्हायणीलाई नवदुर्गाको शक्तिपीठका रूपमा मानिन्छ । यहाँ नवदुर्गा प्रकट हुने जनविश्वासअनुरुप बिजया दशमीको दिन ठुलो जात्रा लाग्ने गर्दछ । महिषासुरको प्रतीक खःमेय् अर्थात् राँगोलाई नवदुर्गा मन्दिरबाट जाँडले मत्याएर लखेट्दै ब्रम्हायणी मन्दिरमा पुर्याई बध गरेपछि रातिदेखि नै यहाँ जात्रा लाग्न शुरु हुन्छ ।
स्थानीय र आसपासका क्षेत्र बाट मात्र नभई वरपरका जिल्ला बाट समेत भक्तजन आउने हुँदा ब्रम्हायणीमा हजारौंको भिड लाग्ने गर्दछ ।