भक्तपुर, १८ असोज २०८०भक्तपुरको पुरानो बाटो स्थित मथ्यपुर थिमि-९ निकोसेरामा सवारी दुर्घटना हुँदा एक पैदल यात्रीको ज्यान गएको छ । बिहीबार बिहान करिब साढे ६ बजे कार र मोटरसाइकल एक आपसमा थोक्किएपछि मर्निङ वाकमा निस्किएका एक मानिसको निधन भएको हो ।
दुर्घटनामा ज्यान गुमाउनेमा जनकपुर धाम स्थायी ठेगाना भइ राधेराधे बस्ने ५८ वर्षीय योगराज बराल रहेका जिल्ला प्रहरी परिसरका डिएसपी वसन्त पाठकले बताएका छन् । बिहीबार बिहान करिब साढे ६ बजे दुर्घटनामा परेर गम्भीर घाइते भएका बराललाई उपचारका लागि भक्तपुर अस्पताल पुर्याइएको थियो । बिहान करिब ७ बजे नै अस्पतालले उनलाई मृत घोषित गरिदिएको हो ।
मर्निङ वाक हिडेका बराललाई निकोसेरा आइपुग्दा थिमि बाट राधेराधे तर्फ आइरहेको बा५च २०४९ नम्बरको कारले ठक्कर दिएको थियो । बिपरित दिशाबाट आएको बागमती प्रदेश ०२-४१प३३१९ नम्बरको मोटरसाइकल र उक्त कार एक आपसमा ठोक्किएपछि कारले पैदल हिडिरहेका बराललाई ठक्कर दिएको डिएसपी पाठकले जानकारी दिएका छन् ।
मोटरसाइकल चालक चाँगुनारायण-२ दुवाकोटका मिलन कार्की र कार चालक मध्यपुर थिमि-६ का अनुज प्रजापतिलाई थिमि बृत्तको नियन्त्रणमा राखी थप अनुसन्धान भैरहेको प्रहरीको भनाइ छ ।