आईसीसी टि-ट्वान्टी विश्वकप छनोट एसिया फाइनल प्रतियोगिताको सेमीफाइनलमा युएईलाई पराजित गर्दै नेपाल २०२४ मा वेस्टइन्डिज र अमेरिकामा आयोजना हुने टि-ट्वान्टी विश्वकप खेल्न छनोट भएको छ।

हेर्नुस स्कोरकार्ड

सन् २०१४ पछि नेपाल दोश्रो पटक टि-ट्वान्टी विश्वकप छनोट भएको हो। दुई वर्ष अघि ओमानमा आयोजित टि-ट्वान्टी विश्वकपको ग्लोबल छनोट अन्तर्गत सेमीफाइनलमा युएईसंग पराजित हुँदा टि-२० विश्वकप छनोट हुन असफल भएको थियो।

आजै सम्पन्न दोश्रो सेमीफाइनलमा बहराइनलाई १० विकेटले पराजित गर्दै ओमान पनि विश्वकप छनोट भएको छ।

आईसीसी टि-ट्वान्टी विश्वकप छनोट एसिया फाइनलको उपाधिको लागि ओमान र नेपाल बीच आइतबार टियु मैदान कीर्तिपुरमा प्रतिस्पर्धा हुनेछ।

मुलपानी मैदानमा सम्पन्न खेलमा युएईले दिएको १३५ रनको लक्ष्य नेपालले

लक्ष्य पछ्याउने क्रममा ओपनर कुशल भुर्तेल ११ रन बनाएर तेश्रो ओभरमा आउट भए। २६/१ को अवस्थाबाट दोश्रो विकेटको लागि आसिफ शेखले गुल्सन झासंग ४१ रनको साझेदारी गरे। गुल्सन दशौँ ओभरमा २२ रन बनाएर आउट भए। तेश्रो विकेटको लागि आसिफ र रोहितले ६८ रनको साझेदारी गर्दै नेपाललाई जितसम्म पुर्याए।

आसिफले चौंथो टि-ट्वान्टी अर्धशतक पुरा गरे जुन क्रममा अविजित ६३ रन बनाए। उनले ५० बलमा ६ चौका र २ छक्का प्रहार गरे। रोहितले २१ बलमा ३ चौका र १ छक्का मद्दतले ३५ रन बनाए। युएई बलर निलांश केसवानी र बसिल हमिदले १/१ विकेट लिए।

टस जितेर ब्याटिङ थालेको युएईले निर्धारित २० ओभरमा ९ विकेट गुमाएर १३४ रन जोड्यो।

यूएईका भृत्य अरविन्दले ६४ रन बनाए। मुहम्मद वासिमले २६, एलिसान सराफुले १६, आसिफ खानले १३, खालिद शाहले ३ र अलि नासिरले ४ रन जोडे। नेपाली स्पीनरहरुले कसिलो बलिङ गरे।

नेपालका कुशल मल्लले ३ र सन्दीप लामिछानेले २ तथा सोमपाल कामी र रोहित पौडेलले एक एक विकेट लिए। सन्दीपले चार ओभरमा एक मेडन राख्दै १४ रन मात्र खर्चिए। कुशल मल्लले ३ ओभरमा ११ रन खर्चिए।