भक्तपुर, ७ मंसिर २०८०जाजरकोट भूकम्प पीडितहरूलाई सहयोग जुटाउन नेपाली काँग्रेस भक्तपुरले पाँच सदस्यीय समिति गठन गरेको छ । उपसभापति बिजेश अवालको संयोजकत्वमा पाँच सदस्यीय समिति गठन गरिएको हो ।
बुधवार बसेको बैठकले जाजरकोट भूकम्प पीडितहरूलाई सहयोग जुटाउन उप सभापति बिजेश अवालको संयोजकत्वमा पाँच सदस्यीय समिति बनाएको जिल्ला सचिव शुशिल बस्नेतले बताएका हुन् । समितिको सदस्य सचिवमा कार्यालय सचिव रूद्र प्रसाद ढुंगाना रहेका छन् ।
सहयोग गर्न चाहनेहरूलाई मोबाइल नम्बर ९८५१०४६३१४ र ९८५१२३००८० मा सम्पर्क राख्न अनुरोध समेत गरिएको छ । बिपत्तीमा सहयोग गर्नु मानवीय धर्म समेत भएको भन्दै सूर्यविनायक नगर सभापति निशान ढुंगेलले भक्तपुरका कांग्रेस नेताकार्यकर्ता मात्र नभई शुभेच्छुक समेतले सहयोगको हात अघि बढाउने बिश्वास व्यक्त गरेका छन् । नेपाली काँग्रेस केन्द्रीय कार्यालयको बैठकले सबै जिल्लाका सभापतिहरूलाई सहयोग संकलन गर्न दिएको निर्देशन बमोजिम बैठक बसेको र सहयोग संकलन कार्यलाई व्यवस्थित बनाउन समिति गठन गरिएको कांगेस नेता कृष्णलाल भडेलको भनाइ छ ।
बैठकले जिल्ला सभापति एवं संघीय सांसद दुर्लभ थापाको शिघ्र स्वास्थ्य लाभको कामना गर्नुका साथै शल्यक्रिया सफलतापूर्वक सम्पन्न गर्ने बरिष्ठ स्वास्थ्यकर्मी डा सुनिल टुकी र अस्पताल परिवारलाई धन्यवाद समेत ब्यक्त गरेको प्रचार विभागका नेता रमेश खड्काले जानकारी गराएका छन् ।
उपसभापति बिजेश अवालको सभापतित्वमा बसेको उक्त बैठकमा जिल्लास्थित केन्द्रीय सदस्यहरु, बागमति प्रदेशका सदस्यहरु त्यसैगरी प्रदेश, क्षेत्र तथा नगरका सभापतिहरु, भातृसंस्थाका सभापतिहरु र जिल्ला पदाधिकारीको उपस्थिति रहेको बताइएको छ ।
