भक्तपुर, १३ पुस २०८०विदेश जान भाषा परीक्षाको विषयलाई लिएर प्रदर्शनकारीले उग्र रुप प्रदर्शन गरेपछि प्रहरीले अश्रुग्यास प्रहार गरेको छ । कोरिया जानका लागि आवश्यक रोजगारी अनुमति प्रणाली (इपीएस) परीक्षाको विषयलाई लिएर भएको प्रदर्शनलाई नियन्त्रणमा लिन प्रहरीले अश्रुग्यास प्रहार गरेको हो ।
प्रदर्शनमा उत्रिएका युवाले सडक अबरुद्ध पार्दै भौतिक पूर्वाधार मन्त्री प्रकाश ज्वालाको बा २ झ ५८६१ नम्बरको गाडी रोकेर उनीहरुले सुरुमा हावा खुस्काएका थिए । लगत्तै उनीहरुले गाडीमा आगजनी गरेका छन् । मन्त्री ज्वाला भने सुरक्षित छन् । त्यस लगत्तै प्रहरी आक्रामक बनेको हो ।
पानी जहाज बनाउने कम्पनीका लागि परीक्षा फर्म भरेका युवाले अन्य क्षेत्रका लागि परीक्षा दिन नमिल्ने इपिएस कार्यालयले जनाएको थियो । पानी जहाजमा परीक्षा दिएका परीक्षार्थीहरूले अनुत्तिर्ण भए फर्म भर्न नपाउने निर्णयविरुद्ध युवाहरु अदालत गएका थिए ।
इपीएस कार्यालयले अदालतमा रिट दायर गर्नेलाई मात्रै आवेदन दिन आह्वान गरेको थियो । अरु विद्यार्थीले फर्म भर्न नपाउने भएपछि उनीहरू विरोध प्रदर्शनमा उत्रिएका हुन् । प्रदर्शनले ललितपुरको बालकुमारी क्षेत्र तनावग्रस्त बनेको छ ।