भक्तपुर क्षेत्र नं २ का प्रतिनिधि सभा सदस्य दुर्लभ थापाको स्वास्थ्य अवस्था बारे बुझ्न सरकारका उपप्रधान एवं रक्षा मन्त्री पूर्णबहादुर खड्का थापा निवास पुगेका छन् । सोमबार सांसद थापाको सल्लाघारीस्थित निजी निवासमा पुगी उपप्रधान एवं रक्षा मन्त्री खड्काले स्वास्थ्य अवस्थाबारे जानकारी लिंदै पुर्ण स्वास्थ्य लाभको कामना गरेका छन् ।

उक्त अवसरमा सांसद थापा र उपप्रधान एवं रक्षा मन्त्री खड्काबीच समसामयिक राजनीतिक विषयमा कुराकानी भएको सचिवालयले जनाएको छ । नेपाली काँग्रेसका जिल्ला सभापति समेत रहेका सांसद थापाले आफ्नो पार्टीको उपसभापति समेत रहेका उपप्रधान एवं रक्षा मन्त्री खड्कालाई सरकारले जनतालाई प्रत्यक्ष राहत पुग्नेगरी प्रभावकारी काम गर्न सुझाव समेत दिएका उनका स्वकीय सचिव सुभाषिस ढकालले जनाएका छन् ।

नेपाली काँग्रेसका उप सभापति समेत रहेका उपप्रधान एवं रक्षा मन्त्री खड्काले राष्ट्रिय सभामा गठबन्धनको उम्मेदवार जिताउन भक्तपुरको कमाण्ड सम्हाल्न सांसद थापालाई निर्देशन समेत दिएका उनका स्वकीय सचिव ढकालले जानकारी गराए । त्यस क्रममा सांसद थापाले भक्तपुरको बिकास निर्माणमा साथ् दिन सरकारको ध्यानाकर्षण समेत गराएका बताइएको छ ।

उक्त अवसरमा नेपाली काँग्रेस भक्तपुरका नेताहरु र सांसद थापाको परिवारका सदस्यहरु उपस्थित रहेका थिए । सांसद थापा मेरुदण्ड र नसा सम्बधित रोग AVN Pelvis को उपचार पछि घरमै रही स्वास्थ्य लाभ गरिरहेका छन् ।