भक्तपुर, ५ माघ २०८०भक्तपुर नगरस्थित भक्तपुर बचत तथा ऋण सहकारी संस्था लि.ले पावर प्वाइन्ट तालिम सुरु गरेको छ । शुक्रवारदेखि तीन दिने तालिम शुरु भएको हो ।
सूचना प्रविधिको सही प्रयोग गरी व्यक्तित्व विकास गर्न र संस्थाका सदस्यहरुलाई विषय बस्तुको प्रभावकारी विनिमय गर्न तालिम शुरु गरिएको संस्थाले जनाएको छ ।शुक्रवार तालिम शुभारम्भको अवसरमा आयोजित कार्यक्रमलाई सम्बोधन गर्दै संस्थाका अध्यक्ष निर्मल प्रजापतिले संस्थाको हरेक सूचनालाई सदस्यहरुमाझ खुलस्त रुपमा बुझाउन सकेमात्र संस्थाप्रति हेर्ने दृष्टिकोण सकारात्मक हुने भएकाले यस तालिमले प्रविधिसँगै सक्षम व्यवस्थापकीय एवं प्रशासनिक नेतृत्व तयार हुने बिश्वास व्यक्त गरे ।
उपसमितिका संयोजक कृष्णश्वरी दुवालले सिक्ने र सिकाउने कार्यमा यस तालिमले मद्दत गर्ने बताउदै प्रविधि र सूचनाको बिकास संगै त्यसलाई उपयोग गर्दै अघि बढ्नुको बिकल्प नभएको उनले बताइन ।
संस्थाका बिभिन्न समिति, उपसमितिका सदस्यहरु र कर्मचारीहरु तालिममा सहभागी रहेका बताइएको छ । प्रशिक्षकद्वय जित बहादुर देउजा र श्रवण श्रेष्ठले तालिम दिने सूचना तथा प्रकाशन उपसमिति सदस्य विमला कुसीले जानकारी गराएकी छन् ।