चाँगुनारायण, २९ फागुन २०८०चाँगुनारायण नगरपालिका वडा नं. ९ ताथलीमा जग्गामा पर्खाल लगाउने क्रममा एक कामदारको ज्यान गएको छ । मंगलवार अपराह्न अचानक माटोको ढिस्को खसेर पुरिँदा घाइते भएका कामदारको ज्यान गएको हो ।
खाली जग्गामा पर्खाल लगाउनको लागि जग खन्ने क्रममा अचानक माटोको ढिस्को खस्न गई मकवानपुर भिमफेदी गाउँपालिका वडा नं. ६ स्थायी ठेगाना भई हाल चाँगुनारायण- ९ हलाल गाँउ बस्ने १६ वर्षीय जसन स्याङतानको ज्यान गएको जिल्ला प्रहरी परिसर भक्तपुरका डिएसपी बसन्त पाठकले बताएका छन् । अपराह्न करिब साढे १२ बजे माटोको ढिस्कोले पुरिएका स्याङतानलाई उद्धार गरी उपचारको लागि ख्वप अस्पताल च्यामासिंह लगेकोमा उपचारकै क्रममा दिउँसो करिब २ बजे उनको ज्यान गएको डिएसपी पाठकले पुष्टि गरे ।
घटनास्थलमा प्रहरी वृत जगातीबाट अनुसन्धान अधिकृत सहितको प्रहरी टोली खटिई गई प्रारम्भिक अनुसन्धान कार्य गरिएको र थप अनुसन्धान कार्य भईरहेको प्रहरी वृत्त जगातीकी प्रमुख दिप्ती कार्कीले जानकारी गराएकी छन् ।
२ वर्ष अघि पनि ताथलीकै ताथली छापमा पर्खाल लगाउनेक्रममै ढिस्को खस्दा दुई जना मजदुरको ज्यान गएको थियो । तरपनि, पर्खाल लगाउने क्रममा जग्गाधनी, ठेकेदार र मजदुरले सुरक्षा सावधानीलाई बेवास्ता गरेका कारण घटना दोहोरिएको स्थानीय नेता जगन्नाथ खत्रीले जनाएका छन् ।