भक्तपुर, २६ चैैत २०८०मध्यपुर थिमिको बोडेमा सम्पन्न उपत्यकाव्यापी धिमे बाजा प्रतियोगितामा सूर्यविनायक नगरपालिका वडा नं १ सिरुटारको लुँनिभा धिमे खलः प्रथम भएको छ । मध्यपुर थिमि नगरपालिकाको आयोजनामा सोमवार सम्पन्न प्रतियोगितामा लुँनिभा धिमे खलः प्रथम भएको हो ।
लाकुछें धिमे गुठी र खपला धिमे गुठीको सहकार्यमा नगरपालिकाले आयोजना गरेको प्रतियोगितामा लुँनिभाले प्रथम हुँदैं शिल्ड, प्रमाणपत्र र नगद २५ हजार रुपैयाँ नगद पुरस्कार पनि जित्न सफल भएको छ ।
लुँनिभा गत शनिवार भक्तपुरको दरवार स्क्वायरमा सम्पन्न प्रथम बागमती प्रदेश स्तरीय धिमे बाजा प्रतियोगितामा पनि प्रथम भएको थियो ।
प्रतियोगितामा चाँगुनारायण नगरपालिका वडा नं ९, ताथलीको ताथली धिमे खलः दोस्रो हुन सफल भएको छ । ताथलीले शिल्ड, प्रमाणपत्र र नगद २० हजार पुरस्कार प्राप्त गरेको छ । ताथली पनि गत शनिवार भक्तपुरमा सम्पन्न प्रथम बागमती प्रदेश स्तरीय धिमे बाजा प्रतियोगितामा दोश्रो नै भएको थियो ।
त्यसैगरी, सूर्यविनायक नगरपालिका १ सिरुटारको श्री नासः धिमे खलः तेस्रो र मध्यपुर थिमिको श्री ईन्द्रायणी धिमे खलः चौंथो हुन सफल भएका छन् । नासः धिमे खलःले नगद १५ हजार र ईन्द्रायणीले नगद १० हजार पुरस्कार प्राप्त गरे ।
प्रतियोगितामा निर्णायक मण्डलले श्री नास भैल धिमे खलः थानकोट काठमाण्डौंलाई जर्ज च्वाइस अवार्ड प्रदान गर्दै प्रोत्साहित गरेको छ ।
प्रतियोगितामा काठमाण्डौं उपत्यकाका विभिन्न नगरपालिकाका ५० वटा धिमे खलः, समूह, पुचः, गुठीहरुको सहभागिता रहेको थियो । उत्साहपूर्णरुपले प्रतियोगिता सकिएको संयोजक दिलकृष्ण प्रजापतिले जानकारी दिएका छन् ।
प्रतियोगितामा विजयी समुहलाई पुरस्कृत गर्दै मध्यपुर थिमि नगरपालिकाका प्रमुख सुरेन्द्र श्रेष्ठले बोडे आफैंमा पनि साँस्कृतिक शहर भएको बताए । प्रतियोगिताले संंंँस्कृति संरक्षणका साथै पर्यटन बिकाशमा सहयोग हुने उनले बिस्वास ब्यक्त गरे । बोडेको जिब्रो छेड्ने जात्राको प्रचारका लागि पनि प्रतियोगिता फलदायी भएको उनको भनाइ छ ।
प्रतियोगितामा युवा वर्गको बाहुल्यता रहेकामा संतोष ब्यक्त गर्दै धिमे बाजालाई पुस्तान्तरण गर्न धिमे बाजा प्रतियोगिताले थप योगदान दिएको नगर प्रमुखले दावी गरेका छन् ।
सामुदायिक विद्यालयको शैक्षिक गुणस्तर बृद्धिका लागि नगरपालिकाले दिवा खाजा, शिशु स्याहार केन्द्र, विद्यालयका अतिरिक्त क्रियाकलापको लागि खेल शिक्षकको व्यवस्था, सामूदायिक विद्यालयको शौचालयको सरसफाई लगायतमा नगरपालिकाले लगानी गरिरहेको उनले बताए ।
मध्यपुर थिमि नगरपालिकाका उपप्रमुख विजयकृष्ण श्रेष्ठले संस्कृतीलाई पर्यटनसंग जोड्नपर्नेमा जोड दिए । बोडेको जिब्रो छेड्ने जात्रा विश्व प्रसिद्ध रहेको चर्चा गर्दै बोडेको ऐतिहासिक सम्पदा, पार्क र पोखरीलाई पयर्टन र आय आर्जनसँग जोड्दै लैजान पर्नेमा उनले जोड दिएका छन् ।
प्रतिनिधि सभा सदस्य संघीय सांसद दुर्लभ थापा, प्रदेश सांसदहरु, जनप्रतिनिधिहरु, सस्कृतीकर्मीहरु र बहुसंख्यक स्थानीयले प्रतियोगिताको अभिरुचीपूर्वक अवलोकन गरेका थिए ।