भक्तपुर, २१ जेठ २०८१उपप्रधान एवं परराष्ट्र मन्त्री नारायणकाजी श्रेष्ठ प्रकाशले मातृभाषाको संरक्षणका लागि पत्रकारिता जगत अघि बढ्नुपर्ने बताएका छन् । मध्यपुर थिमिमा आइतवार सम्पन्न पहिलो अन्तराष्ट्रिय मातृभाषा पत्रकारिता सम्मेलनमा उनले मातृभाषा संरक्षणका लागि मातृभाषा पत्रकारिता अघि बढाउनपर्ने बताएका हुन् ।
सम्मेलन समापनमा प्रमुख अतिथि रहेका उपप्रधान एवं परराष्ट्रमन्त्री श्रेष्ठले मातृभाषाको आफ्नो छुट्टै पहिचान रहेको र त्यो पहिचान भुल्न नहुनेमा जोड दिए । मातृभाषा लोप हुँदै जाने खतरा रहेको भन्दै उनले त्यसको संरक्षण र सम्बर्धनका लागि सरकार प्रतिवद्ध रहेको प्रष्ट पारे ।
माओवादी केन्द्रका उपाध्यक्ष समेत रहेका मन्त्री श्रेष्ठले मातृभाषामा समाचार सम्प्रेषण गर्नु, मिडियाको स्थापना गर्नु मात्र नभई मातृभाषा र संस्कृतिक सम्पदाको साथै मातृभाषा जोगाउने अभियानमा पनि पत्रकारिता जोडिनुपर्नेमा जोड दिए ।
मन्त्री श्रेष्ठले भने, ‘मातृभाषा पत्रिकारिताले समाचार सम्प्रेषण गर्नु, मिडियाको स्थापना गर्नु मात्र होइन, यसले आफ्नो समुदायको संस्कृतिक सम्पदा पनि जगेर्ना गरेको छ। यो पनि मातृभाषा जोगाउने एक अभियान हो।’
सो अवसरमा मध्यपुर थिमिका उपप्रमुख बिजय कृष्ण श्रेष्ठले मातृभाषा संचारको माध्यम मात्र नभई सम्पदा रहेको बताएका छन् । उनले प्रचण्ड नेतृत्वको सरकारले नेपाल सम्बतलाई सरकारी कागजातमा उल्लेख गर्ने र बागमती प्रदेश सरकारले नेपाल भाषा र तामाङ्ग भाषालाई सरकारी कामकाजको भाषा कायम गरी प्रचलनमा ल्याएको प्रति खुशी समेत व्यक्त गरे ।
अन्तराष्ट्रिय मातृभाषा पत्रकारिता सम्मेलनमा छिमेकी लगायत बिभिन्न देशबाट मातृभाषा पत्रकारिता गरिरहेका पत्रकारको सहभागिता रहेको आयोजक समितिका सदस्य बाबुकाजी श्रेष्ठले बताए । कार्यक्रममा विभिन्न मातृभाषाका संस्कृतिक प्रस्तुति समेत प्रदर्शन गरिएको थियो।