![](https://bhaktapurpost.com/wp-content/themes/onlineparda/images/1px.gif)
ईप्सन भक्तपुरको बोर्ड कार्यक्रम अन्तर्गत मदरल्याण्ड स्कूलको आयोजनामा सम्पन्न अङ्ग्रेजी हिज्जे प्रतियोगितामा यूनिटी स्कूल प्रथम, ईडेन गार्डेन स्कूल द्धितीय, ग्लोबल एकेडेमी तृतीय र सेन्ट जोन्स स्कूलले सान्त्वना स्थान हासिल गर्न सफल भएका छन् ।
भक्तपुरका ११ वटा विद्यालयको सामुहिक समूह एडिफाई प्राइभेट स्कूल अर्गनाइजेशन नेपाल (ईप्सन) ले सदस्य विद्यालयको विकास र विद्यार्थीहरुको क्षमता अभिवृद्धिका लागि विविध कार्यक्रम गर्नेक्रममा अङ्ग्रेजी हिज्जे प्रतियोगिता गरिएको आयोजक विद्यालय मदरल्याण्डका प्रिन्सिपल संजय खड्काले बताए । ईप्सन भक्तपुरमा क्वालिटी, सूर्योदय सेकेन्डरी, मदरल्याण्ड, हिमाल, ग्लोबल, पारिजात विद्याकुन्ज, सेन्ट जोन्स, ईडेन गार्डेन, यूनिटी, विमल मेमोरियल विद्यापीठ र नगरकोट सनराइज स्कूल रहेका उनले बताएका छन् ।
निस्पक्षतामा केन्द्रीत रही हिज्जे प्रतियोगितामा आयोजक मदरल्याण्ड स्कूलले भने सहभागिता जनाएको थिएन । प्रतियोगितामा ९ वटा स्कूलका कक्षा ६ देखि ८ का विद्यार्थीहरुको समूहले प्रतिष्पर्धा गरेका थिए । कार्यक्रम डोलेश्वर भिलेज रिसोर्ट सुनपा ८ सिपाडोलको हलमा सम्पन्न भएको थियो ।
कार्यक्रममा ईप्सनका सचिव विजय कर्माचार्यले यस्ता कार्यक्रमले विद्यार्थीहरुमा थप हौसला प्रदान गरेको बताए । त्यसैगरी ईप्सन भक्तपुर अध्यक्ष जिबी खड्काले मदरल्याण्ड स्कुलले निकै नै व्यवस्थित र अनुसरणीय कार्यक्रम गर्न सफल भएकोमा शुभेच्छा व्यक्त गर्दै विद्यार्थीहरुको सफलता नै ईप्सनको सफलता भएको बताए ।
समापन कार्यक्रममा सबै सहभागी विद्यार्थीहरुलाई प्रमाण पत्र, विजेता विद्यार्थीहरुलाई ट्रफी, मेडल र प्रमाणपत्र वितरण गरिएको थियो । मदरल्याण्डको कार्यकारी संचालक शर्मिला देउजाले ईप्सनका सबै पदाधिकारीहरुलाई मायाको चिनो पनि प्रदान गरेकी थिइन् ।