भक्तपुर, ११ असार २०८१नक्कली सीआईबी बन्दै भक्तपुरको सूर्यविनायक-४ दधिकोटका एक ब्यक्तिको घरमा पसेर करिब २ करोड रुपैयाँ लुटपाट गर्ने ४ जनालाई प्रहरीले पक्राउ गरेको छ । मंगलबार प्रहरीले उनीहरुलाई सार्वजनिक गरेको हो ।
पक्राउ पर्नेमा प्रहरीका हवल्दार कृष्ण बहादुर बोहरासहित सुजन रसाइली, भीमबहादुर तामाङ र मुनाराज राई रहेका छन् । प्रहरी हबल्दार बोहरा र तामाङ सिन्धुपाल्चोक भोटेकोशीका हुन् भने रसाइली सिन्धुपाल्चोक बाह्रबिसेका भएको बताइएको छ ।
दधिकोटका डिल्लीराज राउतको घरमा एक साता अघि गत मंगलबार लुटपाट भएको थियो । लुटेराहरु नक्कली सिआइबी बनी उनको घरमा पुगेका थिए र २ करोड दराजबाट निकालेर दिनदहाडै फरार भएका थिए ।
भक्तपुर प्रहरी र अपराध अनुसन्धान कार्यालय मिनभवनको टोलीले उनीहरूलाई पक्राउ गर्न सफल भएको हो । पीडित राउतका मामा कुल बहादुर खत्रीकै योजनामा लुटपाट भएको प्रहरीको भनाइ छ । खत्री भने फरार रहेका छन् । उनको खोजी भैरहेको प्रहरीको भनाइ छ ।
भान्जाको घरमा ठूलो पैसा भएको कुरा थाहा पाएका मामाकै योजनामा लुटपाट भएको देखिन्छ ।’ उपत्यका अपराध अनुसन्धान कार्यालयका एसएसपी सानुराम भट्टराईले भने ।
करिब ३५ वर्षिय राउतले यति ठुलो रकम घरको दराजमा राख्नुको कारण भने थाहा हुन सकेको छैन ।