News Portal

  • मध्यपुर थिमि पर्यटकीय गन्तब्यस्थल बन्न नसकेकोप्रति मेयरको चिन्ता

    भक्तपुर पोष्ट संवाददाता भक्तपुर, २१ ासार २०८१
    १३८ पटक
    भक्तपुर, २१ ासार २०८१

    मध्यपुर थिमि नगरपालिकाका प्रमुख सुरेन्द्र श्रेष्ठले नगरपालिका पर्यटक प्रवर्द्धन गर्ने योजनामा अघि बढेको बताएका छन् । मध्यपुर थिमि नगर कला, संस्कृती र इतिहासको केन्द्र भएपनि पर्यटकीय गन्तब्यस्थल बन्न नसकेकोप्रति चिन्ता व्यक्त गर्दै उनले नगरपालिका पर्यटक प्रवर्द्धन गर्ने योजनामा अघि बढेको बताएका हुन् ।

    शुक्रवार रफत सञ्चार क्लबले आयोजना गरेको “नगरपालिकाको विकास–निर्माण र सेवा प्रवाहसम्बन्धी अन्तर संवाद’ कार्यक्रममा नगर प्रमुख श्रेष्ठले सम्पदा संरक्षणमा मध्यपुर थिमि नगरपालिकाले नमूनायोग्य सफलता प्राप्त गरेको प्रष्ट पारे । मध्यपुर थिमिमा बिभिन्न सास्कृतिक पर्वहरु धुमधामले मनाइने र रात्रीकालिन भजनले नगर क्षेत्र दिनहुँ गुञ्जयमान रहँदा पनि उल्लेखनीय पर्यटक तान्न नसकिएको उनले गुनासो गरे ।

    नगरपालिकाले व: फेस्टिवल, कृषी मेला, प्रदर्शनी, धिमे प्रतियोगिता लगायत प्रवर्धनात्मक कार्यक्रम गरी पर्यटक आकर्षित गर्ने प्रयास गरिरहेको र आन्तरिक पर्यटक प्रवर्द्धनमा यसले सहयोग पुगेको उनले खुलासा गरे । बाह्रय पर्यटक तान्न प्रयास भैरहेको उनको भनाइ छ ।मेयर श्रेष्ठले आगामी कात्तिक महिनामा थिमि महोत्सव आयोजन गर्नुका साथै दिव्यश्वरी र राधेराधेमा सडक खाना महोत्सव गर्ने विशेष योजना रहेको उल्लेख गरे ।

    आगामी आर्थिक वर्षको बजेटमा संघीय सरकारले मध्यपुर थिमि शहरको मौलिकता कायम राख्ने र बागमती प्रदेश सरकारले सम्पदा परिपथमा यस नगरलाई जोड्ने घोषणा गरेकामा सन्तोष व्यक्त गर्दै उनले पर्यटन प्रवर्धन गर्ने नगरपालिकाको नीतिमा यसले सहयोग पुर्याउने बिश्वास व्यक्त गरे ।

    दुई बर्षको कार्यकालमा पहिलो वर्ष नीति, नियम बनाउन लागेको र त्यही नीति, नियमको आधारमा अहिले नगरवासी लाभान्वित भइरहेका भन्दै उनले नगरबासीलाई सेवा पुर्याउने बाहेक आफूहरुको कुनै स्वार्थ नभएको दावी गरे ।

    प्रमख श्रेष्ठले नगरको शिक्षा क्षेत्रको चर्चा गर्दै भने, “हामी निर्वाचित भइसकेपछि शिक्षामा संस्थागत र सामुदायिक विद्यालयमा व्यापक अन्तर (बेमेल) थियो, सामुदायिक विद्यालयमा शैक्षिक गुणस्तर सुधार्नु थियो भने संस्थागत विद्यालयमा जथाभावी शुल्क निर्धारणसम्बन्धी व्यापक गुनासो थियो, त्यसलाई हामीले व्यवहारिक उपायका माध्यमबाट सहजीकरण गर्‍यौं । र, यो हाम्रो महत्वपूर्ण उपलब्धि हो ।”

    प्रमख श्रेष्ठले जेहन्दार विद्यार्थीलाई छात्रवृत्तिका साथै सामुदायिक विद्यालयमा शिक्षक दरबन्दी मिलान गरेपछि अहिले मथिनपामा पठनपाठन सुचारु भएको जानकारी दिँदै भने, “सामुदायिक विद्यालयमा पिउने पानीको रोम्रो प्रवन्ध थिएन, हामीले बजेट छुट्याएर खानेपानीको गुणस्तर सुधार्‍यौं र टेण्डर आह्वान गरेर प्रत्येक सामुदायिक स्कुलमा दिनको दुई पटक शौचालयमा सरसफाइ गर्ने प्रवन्ध गरेका छौं । त्यसका अतिरिक्त विद्यार्थीको पोषण शिक्षालाई ध्यानमा राख्दै जनही विद्यार्थी तीस रुपैयाँका दरले दिवा खाजाको व्यवस्था गरेका छौं । इसिडीका लागि १५ जना शिक्षक नियुक्तिका साथै मथिनपाभित्र चारदेखि पाँचवटा बालविकास केन्द्र खोलेका छौं ।”

    प्रमुख श्रेष्ठले नगरको पूर्वाधार विकासको चर्चा गर्दै भने, “मथिनपाको केन्द्रीय प्रशासनिक भवन आउँदो दशैंसम्म शिलान्यास गर्ने योजना छ । यस्तै नेपाल–कोरिया मैत्री अस्पतालको विस्तारित भवनको पनि शिलान्यास गर्ने योजना छ । यस्तै थिमिको मुख्यचोकदेखि नीलबाराहीसम्म दैनिक सरसफाइ, नयाँँ थिमिबाट पुरानो थिमिमा प्रवेश गर्दा मध्यपुर थिमिको प्राचीन पहिचान स्वरूप दायाँबायाँ बनेका निजी वा गुठी घरमा पुरातात्विक शैली झल्किने गरी परिवर्तन गरिने छ । थिमिको लायकु (दरवार) मा रहेको विद्यालयलाई स्थानान्तरण गरेर पुरानो स्वरूपमा लायकु दरवारलाई पुनःस्थापित गर्नेछौं ।”

    उनले सम्पदा क्षेत्रको संरक्षणात्मक कार्यको विशेष उल्लेख गर्दै भने, “ आजकल मध्यपुर थिमि एक आधुनिक र परम्परागत रूपमा स्थापित भएको नगर बन्दै गएको छ । यसलाई दृष्टिगत गरी आफ्नो परम्परागत पहिचानलाई बचाउन पोटरी स्क्वायर, सेरामिक्स हबका साथै माटाका भाँडाकुँडाको एक जीवन्त संग्रहालय बनाउने योजना छ । उनले काठमाडौं उपत्यकाको आस्था र श्रद्धाको स्थलको रूपमा रहेको नील बाराही मन्दिरको करिब २४ करोड रुपैयाँँको लागतमा संरक्षण गर्ने योजना रहेको छ ।”

    मेयर श्रेष्ठले भने, “नगर सौन्दर्ययीकरण योजनाअन्तर्गत राधेराधेदेखि मनोहरा खोलासम्म १ करोडको लागतमा फराकिलो पेटी र सार्वजनिक शौचालय निर्माणलगायत खाली जग्गामा स–साना विश्रामस्थल बनाएका छौं ।”

    प्रमुख श्रेष्ठले नगरमा पर्यटन पूर्वाधारको विकासको प्रयत्नको चर्चा गर्दै भने, “थिमिमा रात्रिकालीन पर्यटन विकासका लागि सम्पदा क्षेत्रलगायत पर्यटकीय स्थलमा अत्याधुनिक सडक बत्तीको व्यवस्था गरिँदैछ । सडक बत्ती पुरानो थिमिदेखि एसओएससम्म (१६ किलोमिटर) विस्तार गरिने छ ।” उनले हाल मथिनपामा ६० देखि ७० वर्षका ज्येष्ठ उमेर समूह, अपांग, अशक्त, दलित र एकल महिला गरी २० हजार नागरिक स्वास्थ्य बीमाको लाभको दायरामा आएको जानकारी दिए ।

    उनले नगरमा उपलब्ध स्वास्थ्य सुविधाको उल्लेख गर्दै भने, “नगरको नौवटै वडामा शहरी स्वास्थ्य क्लिनिक खोलिएको, अहिले त्यहाँँ स्वास्थ्य सुविधा लिनेहरूको लाम लागेकाले सेवा विस्तार गर्न पूर्वाधारहरूको विस्तार गर्दै ज्येठ नागरिक, गर्भवती महिलाका लागि घरदैलोमै सुविधायुक्त अल्ट्रासाउन्ड र ल्याब टेस्ट सेवा उपलब्ध गराउने योजना रहेको छ । नेपाल कोरिया मैत्री नगर अस्पतालको भौतिक क्षमता अभिवृद्धि गर्दै २५ वटा शल्यक्रिया कक्ष विकास गरिने छ । त्यस अस्पतालमा आइसियु र थप शल्यक्रिया कक्षको विस्तार गरिने छ । यसको सार्थ लायन्स क्लबको १ लाख अमेरिकन डलरको सहयोगमा अत्याधुनिक ब्लड बैंकको स्थापना गरिने छ । साथै अस्पतालको आपतकालीन वार्डमा माइनर अपरेसन कक्षको विकास गरिने छ ।”

    नगर प्रमुख श्रेष्ठले स्वास्थ्य भौतिक पूर्वाधारको विकास र विस्तार गर्ने क्रममा थिमिमा संघीय सरकारबाट दुई सय शय्याको अस्पतालको स्वीकृति लिएर नगरभित्रै नर्सिङ शिक्षा सञ्चालन गरिने जानकारी दिए ।

    उनले मथिनपामा सञ्चालित कमेरोटार, दिव्यश्वरी, मनोहरा, राधेराधे जग्गा एकीकरण आयोजनालाई वैज्ञानिक र व्यवहारिक ढंगबाट सम्पन्न गर्ने लक्ष्य राखिएको विशेष उल्लेख गरे । प्रमुख श्रेष्ठले नगरमा निर्मित घरहरूलाई नियमित गर्ने कार्य सुरु गरिएको र यो अभियानअन्तर्गत दुईदेखि तीन हजार घरहरू नियमितको दायरामा आउने बताए । श्रेष्ठले नगरको सार्वजनिक जग्गाको संरक्षण गर्नेतर्फ महत्वपूर्ण उपलब्धि हासिल भएको पनि चर्चा गरे ।

    उनले नगर क्षेत्रभित्र खेलकुद, पुरानो नक्साको डिजिटाइजेसन, भ्रष्टचार न्यूनीकरण, करसमबन्धी गुनासो सुनुवाइ, आन्तरिक प्रशासनिक सुधार र सुशासनका लागि धेरै प्रयत्नहरूको थालनी गरेको चर्चा गरे ।

    प्रतिकृया दिनुहोस्

    टिप्परमा स्कुटी ठोक्किँदा २१ वर्षीय युवकको निधन

    भक्तपुरमा टिप्परको पछाडि ठोक्किएर दुर्घटनामा परेका स्कुटी चालकको ज्यान गएको छ । ज्यान गुमाउनेमा तेह्रथुम...

    प्रदेशमा भक्तपुरका सांसद थापामगरको मन्त्री पद सुनिश्चित, श्रेष्ठको पनि सम्भावना कायमै

    भक्तपुर-२ (क) सूर्यविनायक क्षेत्रबाट निर्वाचित प्रदेश सभा सदस्य किरण थापामगर र भक्तपुर-१ (क) चाँगुनारायण क्षेत्रबाट...

    सत्ताका लागि खेलोफड्को गर्ने र अस्थिरताको दोष व्यवस्थालाई दिने भन्दै नेपालको कटाक्ष

    नेकपा एकीकृत समाजवादीका अध्यक्ष माधवकुमार नेपाल संसदमा बोल्दै थिए । प्रधानमन्त्री केपी ओलीले आफ्नो पक्षमा...

    प्रधानमन्त्री ओलीले पाए विश्वासको मत

    प्रधानमन्त्री केपी शर्मा ओलीले विश्वासको मत पाएका छन् । प्रतिनिधि सभाको आजको बैठकमा प्रधानमन्त्री ओलीले...

    संकटमा गुरु-शिष्य सम्वन्ध

    “गुरु ब्रह्मा, गुरु विष्णु, गुरु देवो महेश्वर, गुरु साक्षात् परमं ब्रह्मा तस्मै श्री गुरुवे नमः”...