![](https://bhaktapurpost.com/wp-content/themes/onlineparda/images/1px.gif)
भक्तपुरको सूर्यविनायक- ८ संगै जोडिएको काभ्रेको बनेपा-१४ आशापुरीमा श्री झ्याङ्छुप छ्योर्तेन स्तुपा र बुद्धपार्कको उद्घाटन गरिएको छ । प्रमुख अतिथि टुल्कु सङ्गे शेडुब तेन्जीन रेम्पोछे र विशेष अतिथि रहेका बनेपा नगरपालिकाका प्रमुख शान्तिरत्न शाक्यले बुधवार छ्योर्तेन स्तुपा र बुद्धपार्कको उद्घाटन गरेका हुन् ।
सूर्यविनायक- ८ आशापुरीमा रहेको प्रसिद्ध आशापुरेश्वर महादेवको मन्दिर नजिक रहेको झ्याङ्छुप छ्योर्तेन स्तुपा र बुद्धपार्क एक धार्मिक एवं पर्यटकीय गन्तब्यस्थल बन्ने बनेपा नगरपालिकाले बिश्वास लिएको छ । प्रमुख अतिथि रेम्पोछे र विशेष अतिथि नगरपालिकाका प्रमुख शाक्यले छ्योर्तेन स्तुपा र बुद्धपार्क यस क्षेत्रको पवित्रस्थलको रुपमा रहने बताएका छन् ।
वडाध्यक्ष टुल्कु लामाको अगुवाइमा नगरपालिका एवं दाताहरुको आर्थिक सहयोग लिएर झ्याङ्छुप छ्योर्तेन स्तुपा र बुद्धपार्क निर्माण गरिएको बुद्धपार्क उपभोक्ता समितिका अध्यक्ष सुदिप तामाङ्गले जानकारी गराएका छन् । करिब ५ महिना लगाएर निर्माण सम्पन्न गरिएको छ्योर्तेन स्तुपा र बुद्धपार्क निर्माणमा करिब २१ लाख रुपैया लागेको तामाङ्गले जानकारी गराए ।
स्तुपा निर्माणमा व्यक्तिगत दातातर्फ़ सर्वाधिक आर्थिक सहयोग डिपडोलका दामोदर अधिकारीले १ लाख ५० हजार ५ सय २५ रुपैया सहयोग गरेका छन् भने खोला डाडाका श्याम लामाले १ लाख ५ हजार र सिम्रिक एयरलाइन्सले १ लाख सहयोग गरेको छ । रु १ लाख मुनी पनि धेरै दाताले आर्थिक दान दिएका र स्थानीयले उल्लेखनीय जनश्रमदान समेत गरेका स्तुपा उपभोक्ता समितिका अध्यक्ष ओमबहादुर तामाङ्गले जनाएका छन् ।
स्तुपा र बुद्धपार्कको लागि छुट्टा छुट्टै उपभोक्ता समिति बनेको थियो । स्तुपा उपभोक्ता समितिको अध्यक्षमा ओमबहादुर र बुद्धपार्कका लागि सुदिपको अध्यक्षतामा समिति बनेको बताइएको छ ।