भक्तपुर, १६ साउन २०८१भक्तपुरमा हनुमन्ते नदीले अधिकांश तटीय बस्ती डुबानमा पारेको छ । रातभर परेको पानीले हनुमन्तेको बहाव बढेपछि बाढी बस्तीमा पसेको हो ।
भक्तपुरको हनुमानघाट, जगाती, च्यामासिंह, राममन्दिर, बाराहीस्थान र सल्लाघारी आसपासका बस्तीमा पनि बाढी पसेको छ ।
डुबानले तटीय क्षेत्रको जनजीवन प्रभावित भएको छ । डा इवामुरा स्मृती अस्पतालमा पनि पानी पसेको छ भने सिद्धिस्मृती अस्पतालमा पानी पसेपछि सेवा नै ठप्प भएको छ ।
यसैगरी मध्यपुर थिमीको राधेराधे, चारदोबाटो, सागबारी, गठ्ठाघरको तल्लो बेल्ट डुबेका छन् । राधेराधेमा छ लेन सडकको सर्विस ट्रयाक नै खोलामा परिणत बन्न पुगेको छ ।
सूर्यविनायकको तज टोल मुनि र बालकोट लगायतका ठाउँमा समेत बस्ती डुबानमा परेका छन् ।
यस अघि डुबानमा नपरेका बस्तीमा समेत ढलबाट खोलाको पानी पस्ता डुबानको समस्या देखिएको छ ।
भक्तपुरकी प्रमुख जिल्ला अधिकारी रोशनीकुमारी श्रेष्ठले उच्च सतर्कताका लागि आव्हान गर्नुका साथै उद्धारको आवश्यकता भए जानकारी गराउन समेत आग्रह गरेकी छन् । अविरल वर्षाका कारण जिल्लामा बाढी र पहिरोको जोखिम बढेको उनले बताइन ।
नेपाल रेड्क्रस सोसाइटीका जिल्लास्थित स्वयंसेवकहरु उद्धारमा खटिएका छन् । राष्ट्रको लागि दुई घण्टा अभियानका अभियन्ताहरु पनि आवश्यक उद्धार र सहजीकरणका लागि खटिएका उपाध्यक्ष नरेश रन्जितले बताएका छन् । जिल्लास्थित राजनीतिक दलका प्रमुखहरुले पनि आवश्यक व्यवस्थापनमा सहयोग गर्न आफ्ना कार्यकर्तालाई निर्देशन जारी गरेका छन् ।
(शिर्षक अन्यथा भएकोमा सच्याइएको छ ।)