नगरकोट, २ भदौ २०८१भक्तपुरको प्रसिद्ध पर्यटकीय स्थल नगरकोटमा बाटो बिराएर जङ्गलमा हराएका भारतीय पर्यटकहरुको उद्धार गरिएको छ । नगरकोटस्थित मुहानपोखरी रानीझुला क्षेत्रबाट शनिवार साँझ हराएका ३ भारतीय पर्यटकसहित ४ जनालाई सकुशल उद्धार गरिएको हो ।
आइतवार बिहान करिव पौने ४ बजे उनीहरूको सकुशल उद्धार गरिएको चाँगुनारायण-६ का वडाध्यक्ष धनबहादुर लामाले जानकारी गराएका हुन् । उद्धार गरिएका भारतीय पर्यटकहरुमा पतिपत्नी नितिन तिवारी, रश्मि तिवारी र उनीहरूका छोरा तनिस तिवारीका साथै नेपाली गाईड हरिप्रसाद खरेल रहेका वडाअध्यक्ष लामाले जानकारी गराए ।
उनीहरू जंगलमा हराएको खबर प्राप्त हुनासाथ स्थानीयसहित नेपाल प्रहरी, सशस्त्र प्रहरी र नगर प्रहरीको टोली खोजी कार्यमा जुटेको थियो । गएराति पौने १ बजेको समयमा हलहले खोप (खोल्ची) क्षेत्रमा अलपत्र अवस्थामा उनीहरूलाई फेला पारी उद्धार गरिएको वडाध्यक्ष लामाले बताए ।
चाँगुनारायण नगरपालिकाका प्रमुख जीवन खत्रीले शनिवार साँझ मुहानपोखरी रानीझुला पुलबाट विदेशी पर्यटकहरू बाटो बिराएर जंगलतर्फ पसेका जानकारी गराउँदै खोजी कार्यमा सहयोग गर्न सामाजिक सञ्जालमार्फत अनुरोध गरेका थिए ।