भक्तपुर, ७ भदौ २०८१भक्तपुरकी प्रमुख जिल्ला अधिकारी रोशनी कुमारी श्रेष्ठले धार्मिक दानमा गोपनीयता कायम गर्नुपर्नेमा जोड दिएकी छन् । दान गोप्य र स्वेच्छिकरुपले गर्नपर्ने तथा करकाप र देखासेखी रहित बनाउनुपर्ने उनको सुझाव छ ।
सूर्यविनायक-८ स्थित डोलेश्वर मन्दिरको श्रावणी मेला समापन कार्यक्रमलाई सम्बोधन गर्दै सिडिओ श्रेष्ठले धार्मिकस्थल र कार्यक्रमलाई दानमा केन्द्रीत गर्दा असहज स्थिति सिर्जना भएको टिप्पणी गरिन । यसले समाजमा वर्गीय विभेदलाई प्रश्रय दिएको उनले प्रष्ट पारेकी छन् ।
दान गर्न नसक्ने व्यक्तिको पनि धर्ममा उत्तिकै अधिकार भएको र दानको आधारमा सम्मान गर्ने प्रचलनले मानिसको मनोविज्ञानमा गम्भीर आघात पुग्नसक्ने तर्फ सचेत रहनुपर्ने उनको भनाइ छ । ”दान दिन नसक्नेको मनोबल गिर्नेगरी देखाएर दान गर्ने र बढी दान गर्नेलाई सम्मान गरेर नसक्नेलाई हिनताबोध गराउनु हुँदैन ।” उनले भनिन ।
धार्मिक स्थल आस्था र बिश्वासको केन्द्र भएकोले सबै श्रद्धालुको समान पहुँच र अपनत्वको आधारमा चल्नुपर्ने उनले बताएकी छन् । जनप्रतिनिधि र मन्दिर व्यवस्थापन समितिले पारदर्शीता र सुशासनको नमूना प्रस्तुत गरेर अघि बढ्ने बिश्वास व्यक्त गर्दै सिडिओ श्रेष्ठले पारदर्शीताका नाममा शिलालेखमा धनको प्रदर्शनलाई प्रश्रय दिनु नहुनेमा पनि जोड दिईन ।
धार्मिक र सास्कृतिक महत्व बोकेको केदारनाथको शीर डोलेश्वर महादेवको दर्शन गर्न लाखौ धार्मिक पर्यटक आउनु खुशीको कुरा भएको र ३८ दिनको श्रावणी मेला अवधीभर कुनै अप्रिय घटना नहुनु अझ खुशीको कुरा भएको भन्दै उनले जनप्रतिनिधि, मन्दिर व्यवस्थापन समिति, स्वयंसेवक, सुरक्षाकर्मी र स्थानीयप्रति आभार प्रकट गरिन् ।
यस अघि सिडिओ श्रेष्ठले डोलेश्वर महादेवको दर्शन गरी पूजाअर्चना पनि गरेकी थिइन् ।
यो पनि
भ्रष्टाचार प्रमाणित गर्नेलाई एक लाख पुरस्कार दिने मेयर थापाको उद्घोष