भक्तपुर, ७ भदौ २०८१भक्तपुर-२ बाट निर्वाचित प्रतिनिधि सभा सदस्य दुर्लभ थापाले भक्तपुरमा ४ वटा नगरपालिकाको काम नभएको दावी गरेका छन् । ४ नगरपालिकाको सट्टा एउटै उप महानगरपालिका बनाउनुपर्ने उनले बताएका हुन् ।
शुक्रवार नेपाल प्रेस सोसाइटीको साक्षात्कार कार्यक्रमलाई सूर्यविनायकमा सम्बोधन गर्दै सांसद थापाले आफूले यसबारे जिल्ला समन्वय समितिमा समेत जानकारी गराएको खुलासा गरे । भक्तपुरको सानो भूगोलमा धेरै पालिका भएको भन्दै उनले राजनीतिको रोटी सेक्न बाहेक त्यसको औचित्व नभएको जिकिर गरे । देशैभर स्थानीय तहको संख्या घटाउने चर्चा चलिरहँदा भक्तपुरमा पनि एउटै मात्र उपमहानगर बनाएर अघि बढ्नुपर्ने उनले आवश्यकता औल्याएका छन् ।
उनले स्थानीय सरकार प्रमुखहरुमा दम्भ बढेको बताए । संघीय सांसदले धेरै काममा समन्वय गर्नुपर्ने तर, स्थानीय सरकार कुरा सुन्न समेत नचाहने प्रवित्तिले आफू आजित भएको उनको भनाइ छ ।
सांसद थापाले ख्वप:विश्वविद्यालय बनाउन आफू सकारात्मक रहेपनि नेमकिपाको प्रशिक्षण केन्द्रको ढाचामा प्रस्तावित विश्वविद्यालयले मान्यता पाउन नसक्ने प्रष्ट पारे । नगरपालिकाले आफूले संचालन गरेका बाहेक श्री पदम, विद्यार्थी निकेतन र शारदा मावि जस्ता ऐतिहासिक विद्यालयको बिकासमा ध्यान नदिएको उनले आरोप लगाएका छन् । ख्वप: विश्वविद्यालयको स्थापना, विद्यालयको स्तर उन्नती, हनुमन्ते डुबानको समस्या समाधान लगायत धेरै काममा आफू भक्तपुर नगरपालिकालाई सहयोग गर्न तत्पर रहेको उनले बताए ।
नेपाली काँग्रेसका जिल्ला सभापति समेत रहेका सांसद थापाले नेमकिपासंग मात्र नभई सत्ता साझेदार दल नेकपा (एमाले) प्रति पनि असन्तुष्टि प्रकट गरे । ”आफू निर्वाचनको उम्मेदवार हुँदा भक्तपुरमा सबै बिकास भैसकेको प्रचार गर्ने कथित बिकासका ठेकेदारहरुले अहिले दुर्लभ थापाले बिकास गरेन भनेर भ्रम फैलाईरहेका छन् ।” नेकपा एमाले र पूर्व सांसद महेश बस्नेतलाई लक्षित गर्दै उनले भने ।
सांसद थापाले जनप्रतिनिधि र राजनीतिक दलले राम्रोको जस आफूले लिने र नराम्रोको दोष अर्काको टाउकोमा थोपर्ने गरेकोप्रति दुख व्यक्त गरे । सबै राजनीतिक दल र नेताहरुको सामुहिक प्रयासबाट नै जिल्लाको समग्र बिकास सम्भव हुने भन्दै उनले बिकासमा एकता र राजनीतिमा स्वच्छ प्रतिस्पर्धा हुनपर्ने प्रष्ट पारे ।
सडक निर्माणलाई मात्र बिकास मान्न नसकिने भन्दै उनले दीर्घकालीन बिकासको लागि शिक्षा, स्वास्थ्य, खानेपानी, सरसफाई र जनताको आयआर्जन वृद्धिको योजनामा आफूले जोड दिएको दावी गरे ।
सो अवसरमा सांसद थापाले समसामयिक राजनीतिप्रति टिप्पणी गर्दै संसदमा सधै झगडा गरिरहने दुई झगडिया दल नेपाली काँग्रेस र नेकपा एमाले मिलेर सरकार बनाउँदा विश्वमै सकारात्मक संदेश गएको जिकिर गरे । यसले राजनीतिक स्थिरता ल्याएको तथा देश र जनतामा आशाको संचार गराएको उनको जिकिर छ ।
नेपाली कांग्रेस लोकतान्त्रिक शक्ति भएको स्पष्ट पार्दै उनले ठुला दुई दल मिल्दैमा अधिनायकबाद नआउने दावी गरे । आफूहरुले अन्य दललाई समेत समेटेर सरकार बनाएको बताउदै नेपाली काँग्रेसका जिल्ला सभापति एवं संघीय सांसद थापाले माओवादी केन्द्र, रास्वपा र नेकपा( एकीकृत समाजवादी) लगायतका दलसंग समेत सहकार्य गरेर अघि बढ्ने बताए । सरकार बनेपछि टिआरसी बिधेयक संसदबाट पास हुनु त्यसको प्रमाण भएको उनले प्रष्ट पारेका छन् ।
निर्वाचन प्रणाली, समानुपातिक समावेशी लगायत संविधानका केही धारा संशोशन गर्नुपर्ने आवश्यकता औल्याउदै सांसद थापाले सबैको अपनत्व हुनेगरी संविधान संशोधन हुने विश्वास व्यक्त गरे ।
सो अवसरमा नेपाल पत्रकार महासंघ भक्तपुरका सचिव संजीप घिमिरे ‘शुभचिन्तक’ले जनप्रतिनिधिले समय समयमा सामाजिक परीक्षण गराउनुपर्नेमा जोड दिए । राजनीतिले समाज विभाजनको मात्र नेतृत्व गरेको र एकले अर्कोप्रति भ्रामक प्रचार मात्र गरेको भन्दै सचिव शुभचिन्तकले सामाजिक परीक्षणले जनता र जनप्रतिनिधिबीचको दुरी अन्त्य गर्ने विश्वास व्यक्त गरे ।
नेपाल प्रेस सोसाइटीका अध्यक्ष उपेन्द्रराज केसीको अध्यक्षतामा सम्पन्न साक्षात्कार कार्यक्रमको संचालन महासचिव केशव लुइँटेलले गरेका थिए । कार्यक्रममा पत्रकारहरु कृष्ण किसी, आरसी प्रजापति, कृष्ण प्रजापति, रोशन थापा, सुरेन्द्र खतिवडा, देवेन्द्र श्रेष्ठ, निशा कुश्मा, सृजना खतिवडा, रामहरी चौलागाई लगायतको सहभागीता रहेको थियो ।