चाँगुनारायण , १२ भदौं, २०८१ चाँगुनारायण नगरपालिकाका उपप्रमुख रमेश बुढाथोकीमाथि सेवाग्राहीलाई दुर्व्यवहार गरेको आरोप लागेको छ । न्याय माग्न नगरपालिकामा आएका एक सेवाग्राहीले उपप्रमुख बुढाथोकीले दुर्व्यवहार गरेको आरोप लगाएका छन् ।
चाँगुनारायण-३ का ६१ वर्षीय बद्रिप्रसाद दाहालले उपमेयरले आफूलाई कठालो समातेर लछारपछार गरेको र गलहत्याएको आरोप लगाएका हुन् । ”न्याय माग्न जाँदा उपमेयरले कठालो समातेर लछारपछार गर्नुभयो र मेरो सर्टका टाँक पनि चुडाइदिनुभयो, त्यसपछि नगर प्रहरी लगाएर बाहिर निकालि दिनुभयो ।” उनले भने ।
गत शुक्रवार न्यायिक समितिमा आफ्नो सिमानाको जग्गा विवादबारे छलफल हुँदै गर्दा न्यायिक समितिका संयोजकको हैसियतमा इजलासमा बसेका उप प्रमुखले नै आफूमाथि दुर्व्यवहार गरेकाले आफू अन्यायमा परेको सेवाग्राही दाहालको दावी छ ।
उपप्रमुख रमेश बुढाथोकीले भने आफूले कुनै दुर्व्यवहार नगरेको बताएका छन् । उनले आफूमाथि लागेको आरोपको खण्डन गर्दै आफूले आरोपी दाहाललाई सधै आदरपूर्वक व्यवहार गरेको जिकिर गरे ।
”दुर्भाग्यवस सिसी क्यामेरा बिग्रिएका कारण त्यो समयको भिडियो हेर्न सकिएन, भिडियो हेर्न पाएको भए सबैकुरा झर्लंग हुनेथियो ।” उपमेयर बुढाथोकीले भने । त्यतिबेला सेवाग्राही नै उग्र रुपमा प्रस्तुत भएका र उल्टै आफूमाथि आरोप लगाएका उनको भनाइ छ ।
यस विषयमा पत्रकार सम्मेलन नै गरी थप प्रष्ट पार्ने उनको सचिवालयले तयारी गरिरहेको बुझिएको छ ।