प्रथम दारी ग्याङ खुला फुटसल प्रतियोगिताको उपाधी प्रदिप एफ सी भक्तपुरले हात पारेको छ । शनिबार भएको फाइनल भिडन्तमा प्रदिप एफ सीले फुलमाया एफ सीलाई ३–० ले हराउँदै उपाधी उचाल्न सफल भएको हो ।

काठमाडौंको कपनस्थित कान्तिपुर फुटसलको खेल मैदानमा सम्पन्न फाइनल खेलमा प्रदिप एफ सीको तर्फ़बाट सुदर्शन श्रेष्ठ, महेन्द्र कार्की र रितेश लामाले समान १/१गोल गर्दै उपाधी दिलाएका हुन् । फाइनल खेलको म्यान अफ़ द म्याच भने प्रदिप एफ सीका रितेश लामा घोषित भएका छन् ।

विजेता बनेको प्रदिप एफ सीले उपाधीसहित नगद रु ५० हजार हात पार्यो भने उपविजेता फुलमायाले ३० हजारमा चित्त बुझाएको छ । विजयी खेलाडीहरुलाई पूर्व राष्ट्रिय खेलाडी उपेन्द्रमान सिंहले पुरस्कृत गरेका छन् ।

प्रतियोगिताको सर्वोत्कृष्ट खेलाडी प्रदिप एफ सीका सुदर्शन श्रेष्ठ चुनिए । उत्कृष्ट गोलरक्षक भने फुलमाया क्लबका गोलरक्षकको पोल्टामा पर्यो । दारी ग्याङ केन्द्रीय समितिको आयोजनामा भएको २ दिने खुला फुटसल प्रतियोगितामा कुल ३२ टोलीहरुले सहभागिता जनाएका आयोजकको भनाइ छ ।

विजेता टोली प्रदिप एफ सीका प्रशिक्षक प्रदिप ढकालले आफ्नो टीमको मिहिनेत र सहयोगी मनहरुको आशिर्वादले सफलता हात पारेको प्रतिक्रिया दिएका छन् । उनले सहयोगी, समर्थक र शुभचिन्तकलाई धन्यवाद ज्ञापन गरे । जापानबाट सम्झेर प्रदिप एफ सी भक्तपुरलाई आर्थिक सहयोग गर्ने बिश्व थिंङप्रति उनले बिशेष आभार प्रकट गरेका छन् ।