भक्तपुर, १९ भदौ २०८१काठमाडौँ महानगरका मेयर बालेन शाहले आफ्नो स्टाटसलाई सरकारले हटाइ दिएको दावी गरेपछि उनका समर्थक प्रधानमन्त्री केपी शर्मा ओलीसंग असन्तुष्ट रहेका छन् । बालेन समर्थकहरुले फेसबुकमा प्रधानमन्त्री केपी शर्मा ओलीलाई ‘अनफलो’ गर्ने अभियान नै चलाएका छन् ।
मेयर बालेनले भदौ १६ गते एमालेकी प्रदेश सांसद रेखा शर्माले नाबालिकालाई घरेलु कामदार राखेर हिंसा गरेको दाबीसहित फेसबुकमा एउटा पोस्ट गरेका थिए । लामो फेसबुक स्टाटस लेख्दै एमाले कार्यकर्तालाई शिक्षा दिन सो पार्टीका अध्यक्ष एवं प्रधानमन्त्री केपी शर्मा ओलीलाई सुझाव दिएका थिए । नत्र, अध्यक्ष ओली जस्तै उनका कार्यकर्ता पनि अरुको इशारामा चल्नुपर्ने दिन आउने दावी गरिएपछि उनको सो स्टाटस भाइरल भएको थियो ।
उनको सो स्टाटस फेसबुकबाट हटेपछि मंगलबार नै बालेनले अर्को पोस्ट गर्दै भने, ”पोष्ट हटाउने होइन, दोषीलाई करावाही गर्नुपर्यो सरकार ।
बालेनको यो पोष्टले सरकारले उनलाई फेसबुक चलाउन पनि नदिएको उनका समर्थकले अर्थ लगाए। बालेनको पोष्ट हटेपछि शुरु भएको विवादले अब एक अर्काका पेज अनफलो गर्ने अभियानसम्म पुगेका छन । त्यसपछि असन्तुष्ट बालेनका समर्थहरूले ओलीलाई फेसबुकमा अनफलो गर्न शुरु गरेका हुन् ।
मंगलबार प्रधानमन्त्री ओलीको पेजमा ६ लाख ६६ हजार फलोअर्स रहेकोमा बुधबार यो समाचार तयार पार्दासम्म घटेर ५ लाख ८९ हजार पुगेको छ । अहिलेसम्म उनलाई ७७ हजारले अनफलो गरेका छन् ।