भक्तपुर, ८ असोज २०८१दशैं नजिकिदै गर्दा सूर्यविनायक नगरपालिकाले बजार अनुगमनलाई तीब्रता दिने भएको छ । उपप्रमुख सरिता तिम्सिना भट्टराईको नेतृत्वमा मंगलवारबाट दशैं केन्द्रीत बजार अनुगमन शुरु भएको हो ।
नियमित र आकस्मिक दुबै प्रकारका अनुगमन गर्ने नगरपालिकाले नीति लिएको छ । खाद्यान्नका स्टोर्सहरुबाट अनुगमन शुरु गर्न लागिएको उपप्रमुख भट्टराईले भक्तपुरपोस्ट संग भनेकी छन् । दशैंमा बढी खपत हुने खाद्यान्न, लत्ताकपडा, मरमसाला, डेरी र मासु पसलहरुमा नियमित अनुगमन प्रभावकारी पारिने उनले प्रष्ट पारेकी छन् । त्यसका अलावा उपभोक्ताका गुनासा र सूचनादाताको सूचनाको आधारमा आकस्मिक अनुगमनका लागि पनि तयारी गरिएको उनको भनाइ छ ।
अनुगमनबाट ब्यापारीहरु तर्सनु नपर्ने पनि उनको प्रष्ट पारेकी छन् । “ब्यापारीलाई दु:ख दिनु नभई सम्भावित कालाबजारी रोक्नु हाम्रो उदेश्य हो ।” उनले भनिन् । असल र सुपथ ब्यापारी वर्गलाई अनुगमनले फाइदा नै पुर्याउने बताउदै उनले अनुगमनले ब्यापारीलाई पेशाप्रति इमान्दार बन्न प्रेरित गर्ने बिश्वास ब्यक्त गरिन् ।
उपभोक्तालाई पनि सचेत भएर कारोबार गर्न सुझाव दिँदै उपप्रमुख भट्टराईले आफू मूल्य र गुणस्तरमा ठगिएको शंका लागे नगरपालिकालाई जानकारी गराउन आग्रह गरिन् । “ठगिएको शंका लागे हामीलाई भन्नुस् र अरुलाई ठगिनबाट जोगाउनुस् ।” उपप्रमुख भट्टराईले भनिन् ।