भक्तपुर, १३ असोज २०८१चौतर्फी सुन्दर भक्तपुर नगर छाडा कुकुरका कारण कुरुप बन्ने खतरा पैदा भएको छ । ऐतिहासिक एवं सास्कृतिक सुन्दरताको रसास्वादन गर्न आएका पर्यटकले पाइला पाइलामा कुकुरको भय बोक्नुपरेपछि यसको सुन्दरतामा दाग देखिएको हो ।
भक्तपुरको सम्पदामा हराउदै गर्दा आफ्नो टोलीका एक सदस्यलाई गल्लीका दुईटा कुकुरले लखेटेर टोकेको देखेपछि आफूहरुको सातो गएको जर्मन पर्यटकहरुले जानकारी गराए । बाहिरबाट आएका हिडाई र भेषभुषा थोरै फरक देख्ने बित्तिकै भक्तपुरको गल्ली गल्लीमा अड्डा जमाएर बसेका कुकुरको हुलले कतिवेला कसलाई टोक्ने ठेगान नहुने पर्यटन ब्यवसायीहरु बताउँछन् ।
दुनियाँभरिबाट यहाँ दैनिक सयौंको संख्यामा बाह्य पर्यटकहरूको आवतजावत हुन्छ । तिनीहरूले भक्तपुरको अदभूत कला संस्कृति र सुन्दरता हेर्न व्यस्त भईरहँदा कतिवेला कुकुर आएर टोकिहाल्ने हो भन्ने मनमा डर हुने गरेको तितो अनुभूति पोखेका छन् ।
बालाखु टोल र दरबार स्क्वायर आसपासमै कुकुरले टोकेर घाइते हुनेको संख्या उल्लेख्य छ । भक्तपुर अस्पतालमा यो वर्षको वैशाखदेखि भदौसम्ममा हरेक महिना २ सय बढी व्यक्तिले रेबिज विरुद्धको सुई लगाउन आएको देखिन्छ । यो अस्पतालमा मात्रै दैनिक १२ देखि १५ जना कुकुरले टोकेर उपचार गराउन आउने गरेको अस्पताल इमरजेन्सी कक्षका इन्चार्ज डाक्टर पार्वता निरौलाले बताएकी छन् ।
परिवार सहित यहाँ आउने पर्यटक मात्र नभई नगरवासी पनि कुकुरको आतंकले परेशान भएको स्थानीय विजेन्द्र पुलाछें बताउँछन ।
दरबार स्क्वायर क्षेत्र बाहिर वरिपरि जिल्लाका सरकारी कार्यालयहरू, प्रशासनिक अड्डाहरूसँगसँगै अस्पताल र आधा दर्जन जति विद्यालयहरू छन् । गल्लीबाट विद्यालय जाने वा यही क्षेत्रमा खेल्ने स्कुले बालबालिकालाई त दौडेकै निहुँमा हेर्दाहेर्दै कुकुरले टोकिहाल्ने पाँचतल्ले दरबार क्षेत्रमा क्याफे संचालन गरेर बसेका उपेश हाडाले जानकारी दिए ।
नगरको मात्रै नभई जिल्लाकै मुटु मानिने भक्तपुर दरबार स्क्वायर अन्तर्राष्ट्रिय पर्यटनको केन्द्रको रूपमा रहेको छ।दरबार स्क्वायरको संरचनागत सुन्दरताले वैश्विक आँखा र ध्यानलाई आकर्षित गर्दै आएको छ । विश्व सम्पदा सूचीमा सूचीकृत दरबार स्क्वायरलाई नगरपालिकाले त्यसै अनुरुप विकास पनि गर्दै लगेको छ । तर, नगरपालिका सामू कुकुर आतंक चुनौती बनेर खडा भएको छ ।
नगरलाई आफूले यसबारे ध्यानाकर्षण गराउने दरबार स्क्वायर क्षेत्रको अधिकांश भुभाग पर्ने भक्तपुर नगरपालिका वडा नम्बर २ का वडा अध्यक्ष हरिप्रसाद बासुकलाले प्रतिवद्धता प्रकट गरेका छन् ।
भक्तपुर नगरपालिकाकी उपप्रमुख रजनी जोशीले पशु अधिकारको संरक्षण अन्तर्गत कुकुरलाई मार्न नहुने बताइन् । अहिलेसम्म कुकुर नियन्त्रणका लागि धेरै प्रयास गरेपनि खासै सफलता हात नलागेको उनले स्वीकार गरेकी छन् । उनले दरवार क्षेत्रमा छाडा कुकुर नियन्त्रण गर्न प्रभावकारी योजना बनाइने प्रतिवद्धता पनि प्रकट गरिन ।
भक्तपुर नगरको सुन्दरता र पर्यटकको सुरक्षा भक्तपुरबासीको पनि जिम्मेवारी हो । स्थानीयले पनि आफ्नो पाल्तु कुकुरलाई छाडा नछोड्ने ब्यवस्था गर्नुपर्ने जरुरी देखिन्छ ।
