भक्तपुर, १५ असोज २०८१बाढी पहिरोमा परी घाइते भएर अस्पताल भर्ना भएका विरामीहरुलाई निशुल्क स्याउ बितरण गरिएको छ । जुम्लाका एक मनकारी युवा व्यवसायीले सोमवार अस्पताल पुगेर सो जुम्लाको स्याउ वितरण गरेका हुन् ।
जुम्ला जिल्लाको सिँजा गाउँपालिका घर भई काठमाडौं उपत्यकामा फलफूल व्यवसाय गर्दै आएका जयऋषि उपाध्यायले धुलिखेल अस्पताल भर्ना भएका करिब दुई सय बिरामीलाई जुम्लाको स्याउ लगायतका फलफूल वितरण गरेको अस्पतालले जनाएको हो ।
विपत परेको बेला आफूले पैसा वा अन्य केही सहयोग गर्न नसके पनि जे छ त्यसैले अरुलाई सहयोग गर्नुपर्छ भने विचारले बेच्नको लागि भनेर भक्तपुरको गोदाममा गत मंगलवार नै जुम्लाबाट धेरै मात्रामा ल्याइएको करिब एक क्विन्टल स्याऊ जय ऋषिले बिरामीलाई सितैमा बाँडे ।
जुम्लाका स्याउ लगायत हिमाली पहाडी जिल्लाका स्थानीय उत्पादनहरू देशको राजधानीसम्म ल्याएर प्रवर्धन र व्यवसायकरण गर्न जुटेका युवा हुन जयऋषि । रोग र भोकले अस्पतालको बेडमा छटपटिएको बिरामीहरूलाई फलफूल वितरण गर्न पाउँदा आफू अत्यन्तै हर्षित भएको उनले प्रतिक्रिया दिएका छन् ।