भक्तपुर जिल्लाब्यापी विद्यालयस्तरीय देउसी भैलो रनिङ्ग शिल्ड प्रतियोगिताको उपाधी सरस्वती माविले उचालेको छ । गत वर्षको बिजेता महेन्द्र विद्याश्रमलाई पछि पार्दै सरस्वतीले उपाधी उचालेको हो ।

प्रतियोगितामा महेन्द्र विद्याश्रम दोस्रो र एड्भान्स एकेडेमीले तृतियस्थान प्राप्त गरेका छन् । सान्त्वना स्थानमा विनायक शिक्षा निकेतन र जनप्रेमी उच्च मावि रहेका छन् ।

आकर्षण, मौलिकता र सृजनशीलता लगायतलाई आधार मानी मूल्यांकन गर्दा सो नतिजा आएको प्रतियोगितामा निर्णायक रहेका कलाकर्मी तथा सञ्चारकर्मी जीवन ढुङ्गानाले जानकारी दिए ।

भक्तपुर नगरपालिका वडा नम्बर १० मुलढोकास्थित आयोजक इष्ट पोइण्ट एकेडेमीले हरेक वर्ष विद्यालय स्तरीय देउसी भैलो प्रतियोगिताको आयोजना गर्दै आएको छ । मंगलवार समन्न प्रतियोगितामा १ दर्जन विद्यालयले प्रतिस्पर्धा गरेका थिए । विद्यार्थीलाई परस्परा र संस्कृति बुझ्न र जगेर्ना गर्न प्रेरित गर्ने  उदेश्यले प्रतियोगिता गर्दै आएको विद्यालयका संस्थापक प्रिन्सिपल रमेशचन्द्र श्रेष्ठले बताएका छन् ।

प्रतियोगिताको उद्घाटन गर्दै भक्तपुर नगरपालिकाका उप प्रमुख रजनी जोशीले नगरपालिकाले निरन्तर रुपमा सम्पदा संरक्षण सँगसँगै कला र सँस्कृतिको संरक्षण गरिरहेको अवगत गराएकी थिइन् ।

उनले नगरपालिकाले स्थानीय पाठ्यक्रम लागू गरी विद्यार्थीहरुलाई कला,संस्कृति र सम्पदा सम्बन्धी ज्ञान दिएको दावी गरिन ।

सो अवसरमा विशेष अतिथि रहेका बाजुरा जिल्ला अदालतका जिल्ला न्यायाधीश लालकाजी श्रेष्ठले नेपाल विभिन्न जात जाती र धर्म संस्कृति मान्ने थलो भएको हुँदा धार्मिक सहिष्णुता र एक आपसमा सद्भाव कायम गर्न यस्ता कार्यक्रम सहयोगी सिद्ध हुने बिश्वास ब्यक्त गरे । यस्ता कार्यक्रमले नयाँ पुस्तामा पर्वप्रति उत्साह र अपनत्व जागृत गराउने उनले बताएका थिए ।