भक्तपुर, १४ कार्तिक २०८१भक्तपुर नगरव्यापी विद्यालयस्तरीय खेलकुद सम्पन्न भएको छ । ६ दिन देखि जारी प्रतियोगिता बुधबार पुरस्कार वितरणसहित सम्पन्न भएको हो ।
नेपाल मजदुर किसान पार्टीका सचिव एवम् संघीय सांसद प्रेम सुवालको प्रमुख आतिथ्यमा भएको ‘पुरस्कार वितरण तथा समापन कार्यक्रम’ मा १५ वटा विभिन्न खेलकुदका विजयी खेलाडी र विद्यालयहरूलाई मेडल, खेलकुद सामग्री र सिल्ड वितरण गरिएको थियो ।
कार्यक्रममा विजयी खेलाडीहरूलाई प्रमुख अतिथि प्रेम सुवाल, विशेष अतिथिद्वय बागमती प्रदेश सभा सदस्य सृजना सैंजु र भक्तपुरका प्रमुख जिल्ला अधिकारी गोपालप्रसाद अर्याललगायतले ट्रफि, मेडल, प्रमाणपत्र र खेलकुद सामग्री वितरण गरेका थिए ।
भक्तपुर नपाको आयोजनामा भएको ६ दिने खेल महोत्सवमा नगरभित्रका ८४ वटा विद्यालयका २ हजार ८ सय ४६ जना विद्यार्थीहरुले प्रतियोगितामा उत्सापूर्वक भाग लिएका थिए ।
प्रतियोगिताअन्तर्गत बिजयी खेलाडीहरुको लागि नगरपालिकाले १ हजार २ वटा मेडल र ६८ वटा ट्रफीको व्यवस्था र ३७ जना उदीयमान खेलाडी घोषणा गरेर सममान प्रदान गरेको छ ।
समापन कार्यक्रममा सांसद सुवालले खेलकुद स्वास्थ्य, अनुशासन, मित्रता र देशको सार्वभौमिकताको लागि हुनुपर्छ भन्दै खेलकुद शारीरिक व्यायाम हो र यसले रोग प्रतिरोधात्मक क्षमता अभिवृद्धि गर्ने बताए ।
खेलमैदान निर्माणले खेलाडीहरुमा उत्साह थपिने बताउँदै उनले खेलकुदको माध्यमबाट खेलाडीहरुको व्यक्तित्व विकासमा मद्दत मिल्ने पनि बताए ।
खेलमा हारजित भन्दा पनि मित्रता र अनुशासन महत्वपूर्ण हुने बताउदै उनले देशको सार्वभौमिकता जोगाउनुपर्ने बेला खेलाडीहरु अग्र मोर्चामा उभिनुपर्ने आवश्यकता औल्याए ।
भक्तपुर नपा वडा नं. १ दुधपाटीस्थित ८०० वर्ष पुरानो भाजु पुखु पुनःनिर्माण कार्यले भक्तपुर क्याम्पस र पोखरी परिसर अझ सुन्दर देखिएको बताउँदै पोखरीको दक्षिणपट्टीको डिल निर्माण पनि सम्पदा संरक्षणकै सिलसिला भएको हुँदा क्याम्पस र पोखरीबीच समन्वयकारी भूमिका रहनुपर्ने उनको भनाइ छ ।
कार्यक्रमका सभापति भक्तपुर नगरपालिकाका प्रमुख सुनिल प्रजापतिले कार्तिक ९ गतेदेखि १४ गतेसम्म सञ्चालित विद्यालयस्तरीय खेलकुद प्रतियोगितामा विद्यालय र विद्यार्थीहरुको उत्साहजनक सहभागिता रहेको बताउँदै सहभागी सम्पूर्ण खेलाडी र विद्यालयलाई धन्यवाद ज्ञापन गरेका छन् ।
उनले खेलकुद प्रतियोगिता अवधिभर सिंगो भक्तपुर खेलकुदमय बनेको बताउँदै खेलकुद क्षेत्रलाई प्राथमिकतामा राख्दै राष्ट्रिय र अन्तर्राष्ट्रिय खेलाडी उत्पादन गर्ने आधार निर्माणको क्रममा नपाले काम गरिरहेको बताए ।
खेलाडीहरुले अध्ययनसँगै खेलकुदमा पनि जोड दिन आग्रह गर्दै प्रमुख प्रजापतिले देशको लागि आवश्यक अनुशासित नागरिक तयार गर्ने उद्देश्यले भक्तपुर नपाले विविध गतिविधि सञ्चालनमा जोड दिँदै आएको उल्लेख गरे ।
भक्तपुर अस्पतालमा सिटी स्क्यान मेसिन राख्न जग्गा अभाव भएको सन्दर्भलाई जोड्दै उनले भक्तपुर नपाले भक्तपुर अस्पताललाई आवश्यक सहयोग निरन्तर गर्दै आइरहेको पनि सोही क्रममा प्रष्ट पारे ।
बागमती प्रदेश सांसद सृजना सैंजुले नगरपालिकाको आयोजनामा भएको खेल महोत्सव आफैमा खेल सिकाइको महत्वपूर्ण उपलब्धी भएको बताउँदै खेलकुदको माधयमबाट पनि राष्ट्रिय र देशभक्तिपूर्ण भावना उजागर गर्न सकिन्छ भन्ने दृष्टान्तहरु प्रस्तुत गरिन ।
इजरायलले प्यालेष्टाइनमाथि गरिरहेको नरसंहारको विरोध र प्यालेष्टाइनी जनताप्रति ऐक्यबद्धता जनाउनु न्यायप्रेमी जनताको कर्तव्य भएको बताउँदै उनले खेलाडीहरुले फासीवादको विरोध गर्नुपर्नेमा जोड दिइन ।
कार्यक्रममा भक्तपुर नपाका उपप्रमुख रजनी जोशी, युवा तथा खेलकुद समितिका संयोजक एवम् वडा नं. १ का वडाध्यक्ष श्यामकृष्ण खत्री, खेलकुद समितिका सदस्य उकेश कवां,उपेन्द्र सुवाल र रामसुन्दर बासीले पनि खेलकुदको महत्व र नगरपालिकाको प्राथमिकताबारे प्रकाश पारे
।