भक्तपुर, २१ कार्तिक २०८१भक्तपुरमा मोटरसाइकलको ठक्करबाट एक महिलाको ज्यान गएको छ । ज्यान गुमाउने महिला भक्तपुर-६ भोलाछें घर भई सूर्यविनायक-५ कटुन्जे बस्ने ६९ वर्षीया बिमला प्रधानाङ्ग हुन् ।
पैदल हिडिरहेकी बिमलालाई मंगलवार अपराह्न कटुन्जेचोक सल्लाघारीमा छ लेन सडक पार गर्नेक्रममा मोटरसाइकलले ठक्कर दिएको थियो । सूर्यविनायकबाट सल्लाघारी तर्फ जाँदै गरेको बागमती प्र.०२-०२१ प. ८१२७ नम्बरको पल्सर मोटरसाइकलले ठक्कर दिँदा उनी गम्भीर घाइते भएकी थिइन् । उनलाई तत्काल उद्धार गरी नयाँ थिमिस्थित मध्यपुर अस्पताल पुर्याइएको थियो । उपचारको क्रममा बुधवार बिमलाको ज्यान गएको जिल्ला प्रहरी परिसर भक्तपुरका डिएसपी ढुण्डिराज नेउपानेले बताए ।
दुर्घटना गराई फरार रहेका मोटरसाइकल चालकलाई मोटरसाइकलसहित बुधवार नियन्त्रणमा लिइएको समेत डिएसपी नेउपानेले जानकारी दिएका छन् । मोटरसाइकल चालक रामेछापको सुनापती गाँउपालिका वडा नं. ५ घर भई हाल भक्तपुरको चाँगुनारायण नगरपालिका वडा नं. १ दुवाकोट बस्ने २६ वर्षीय दिपक मानन्धर रहेका प्रहरीले जनाएको छ । उनलाई नियन्त्रणमा लिई प्रहरी वृत्त जगातीमा राखी थप अनुसन्धान कार्य भईरहेको प्रहरीको भनाइ छ ।