भक्तपुर, २८ कार्तिक २०८१भक्तपुरमा चोरीको आरोपमा एक युवक पक्राउ परेका छन् । पक्राउ पर्नेमा दोलखा शैलुङ गाँउपालिका-५ घर भई लौहकिन्थली बस्ने ३४ वर्षिय नविन भन्ने रवि कार्की रहेका छन् ।
तिहारको समयमा गत कात्तिक १३ गते कोही नभएको मौकापारी मध्यपुर थिमि-२ रामेश्वर मन्दिर स्थित कृष्ण बहादुर कार्कीको कोठाबाट धनमाल चोरेको आरोपमा उनी पक्राउ परेका जिल्ला प्रहरी परिसर भक्तपुरका डिएसपी ढुण्डीराज नेउपानेले जानकारी दिए । सुन, चाँदीको गरगहना तथा नगद सहित अन्दाजी २ लाख २० हजार बराबरको धनमाल चोरी भएको घटनामा अनुसन्धान गर्दा उनलाई पक्राउ गरिएको प्रहरीको भनाइ छ ।
सिसिटिभी फुटेजका आधारमा अनुसन्धान गर्दा कार्की प्रहरी फन्दामा परेका हुन् । उनी यस अघि पनि चोरीको आरोपमा जेल बसेर आएका देखिएको प्रहरी वृत्त थिमिले बताएको छ । भक्तपुर जिल्ला अदालतबाट ५ दिनको म्याद लिएर उनीमाथि थप अनुसन्धान कार्य अघि बढेको अनुसन्धानमा संलग्न प्रहरीले बताएका छन् । थिमिमा तिहारकै समयमा लक्ष्मी पूजा गरी राखेको गरगहना चोरिएको घटनामा भने हालसम्म कोहीपनि पक्राउ पर्न नसकेको र खोजी कार्य भैरहेको प्रहरीको भनाइ छ ।