मध्यपुर थिमि, ४ मङ्सिर २०८१ मेडिकल व्यवसायी एवं चर्चित अभियन्ता दुर्गाप्रसाद प्रसाई पक्राउ परेका छन् । मंगलवार अपराह्न भक्तपुरको मध्यपुर थिमि-६ निकोसेरास्थित निजी निवासबाट उनी पक्राउ परेका हुन् ।
प्रहरीको केन्द्रीय अनुसन्धान ब्युरोले उनलाई पक्राउ गरेको हो । ब्युरोका प्रवक्ता रहेका एसपी होविन्द्र बोगटीले प्रसाईलाई जिल्ला अदालत काठमाडौंको अनुमति लिएर पक्राउ गरिएको बताएका छन् । प्रसाईलाई प्रधानमन्त्री केपी शर्मा ओलीको कम्बोडियामा लगानी रहेको भ्रामक समाचार फैलाएको अभियोग लागेको छ । सोही अभियोगआमा पक्राउ गरी थप अनुसन्धानका लागि उनलाई साइवर ब्युरो भोटाहिटी पठाईएको एसपी बोगटीले बताए ।
प्रसाईंमाथि ब्युरोले विद्युतीय कारोबार ऐन २०६३ अनुसार कारबाही अघि बढाउने बताइएको छ । ५३ वर्षीय प्रसाई यस अघि पनि विद्युतीय कारोबार ऐन आकर्षित हुँदा गत असोजमा पक्राउ परेका थिए । नेकपा(एमाले)को केन्द्रीय सदस्य एवं उद्योग, व्यापार विभागको उपप्रमुख रही सकेका उनी पछिल्लो समय आफ्नै नेतृत्वमा अभियान संचालन गरी चर्चामा रहेका छन् । विशेषत: एमाले अध्यक्ष ओली माथि उनी आक्रामक देखिन्छन । वर्तमान संघीय लोकतान्त्रिक गणतन्त्रको नै बिरुद्धमा उभिएका उनी बैंक तथा वित्तीय संस्थाहरूको ऋण नतिर्ने अभियान संचालन गरेर राजनीतिमा चर्चित भएका हुन् ।