वागमती प्रदेश सरकारका वन तथा वातावरण मन्त्री कृष्ण प्रसाद सिलवालसँग राष्ट्रका लागि दुई घण्टा अभियानका महासचिव नवराज काफ्लेले भेटवार्ता गरेका छन् । प्रदेश राजधानी हेटौडामा भएको भेटवार्तामा बढ्दो वातावरण प्रदुषण नियन्त्रणबारे गहन छलफल भएको अभियानका महासचिव काफ्लेले बताएका छन् ।

छलफलको क्रममा देशको संघीय राजधानी काठमाडौं विश्वकै छैटौ प्रदुषित शहरको रुपमा देखिएकोप्रति मन्त्री सिलवालले चिन्ता व्यक्त गरे । काठमाडौं उपत्यकाको बढ्दो प्रदुषणको कारण पहिचान गरी नियन्त्रणको विशेष योजना बनाई अघि बढ्न मन्त्रालय तत्पर रहेको उनले बताएका छन् ।

मन्त्री सिलवालले उपत्यका भित्र बसेर वातावरणको विषयमा काम गर्ने संघसंस्था, अभियन्ता, वातावरणविद एवं सरोकारवालासँग छलफल तथा अन्तरक्रिया कार्यक्रम गर्ने र त्यसको निष्कर्षबाट योजनालाई गति दिने प्रतिवद्धता प्रकट गरेका छन् ।

मन्त्री सिलवालले यसै महिनाको अन्तिम हप्तामा सो कार्य गर्ने गरि आवश्यक समन्वय गर्न राष्टको लागि २ घण्टा अभियानका महासचिव काफ्लेलाई आग्रह समेत गरे । बढ्दो प्रदुषण नियन्त्रणका उपाय पहिल्याउन र लागू गर्न सो अन्तरक्रिया लाभदायक रहने उनले बिश्वास व्यक्त गरे ।

बागमती प्रदेश सरकारको वन तथा वातावरण मन्त्रालयले आयोजना गर्न खोजेको उक्त अन्तरक्रिया कार्यक्रमको संयोजन गर्न राष्टको लागि २ घण्टा अभियान तत्पर रहेको महासचिव काफ्लेले बिश्वास दिलाएका छन् । उनले अन्तरक्रिया काठमाडौं उपत्यका भित्र उपयुक्त स्थानमा आयोजना गरिने जानकारी गराउंदै मिति र स्थान निश्चित भएपछि सहभागिताका लागि खबर गरिने जानकारी दिए ।

अन्तरक्रियालाई कोठे बैठकमा सीमित नगरी सरोकारवालाको सक्रियतालाई प्राथमिकता दिईने र योजना निर्माणमा सहयोग पुर्याउने उनको दावी छ ।