भक्तपुरको चाँगुनारायण नगरपालिकाका प्रमुख जीवन खत्रीले सरकारविरुद्ध आन्दोलन गर्नुपर्ने आवस्था आएको गुनासो गरेका छन् । स्थानीय सरकारका प्रमुख समेत रहेका खत्रीले माथिल्लो तहका संघ र प्रदेश सरकार बिरुद्ध आन्दोलन गर्नुपर्ने अवस्था आएको गुनासो गरेका हुन् ।

शुक्रवार नगरकोट भ्रमण वर्ष-२०८२ को तयारी बारे एक अन्तरक्रिया कार्यक्रममा उनले संघ र प्रदेश सरकारको कामको आलोचना गरे । नेपाल प्रेस सोसाइटीले आयोजना गरेको अन्तरक्रिया कार्यक्रममा नगर प्रमुख खत्रीले पटकपटक आग्रह गर्दा पनि राज्य गैरजिम्मेवार बनेको र आफ्नो नगरपालिकाका सडक निर्माणलाई बेवारिसे बनाएको आरोप लगाए ।

नगरकोट भ्रमण वर्ष २०८२ को सम्पूर्ण तयारी लगभग पूरा भइसकेको भए पनि भक्तपुर-नगरकोट जोड्ने मुख्य सडक निर्माण सम्पन्न नहुँदा भ्रमण वर्ष प्रभावित हुने खतरा भएको उनको भनाइ छ । ”०७१ असार मसान्तमै निर्माण सम्पन्न गरिने गरी ठेक्का दिएको संघीय सरकारले अहिलेसम्म हाम्रो सडक निर्माण सम्पन्न गरेन ।” नगर प्रमुख खत्रीले आक्रोश पोखे ।

भारतीय एक्जिम बैंकको ऋण सहयोगमा संघीय सडक सुधार आयोजना अन्तर्गत निर्माण भएको करिब १६ किमीको भक्तपुर-नगरकोट सडक खण्ड चौडा गरी कालोपत्रे गर्न भारतीय कम्पनी एआइसीपिएल र नेपाली कम्पनी एससीपिएल (शैलुङ कन्स्ट्रक्सन) काठमाडौंले संयुक्त ठेक्का पारेका  थिए ।

त्यसैगरी, चाँगुनारायण नगरपालिकाको महत्वपूर्ण पर्यटकीयस्थल चाँगुनारायण मन्दिर जाने भक्तपुर-चाँगुनारायण सडक पनि भ्रमण वर्ष शुरु हुँदा सम्म सम्पन्न हुने छाटकाट देखिएको छैन ।

बागमती प्रदेश सरकारको भौतिक पूर्वाधार विकास कार्यालयले यो सडकलाई समयमै निर्माण गर्न नसक्ने अवस्था भएपछि भ्रमण वर्ष प्रभावित हुने भएको छ । दुवै सरकारका काम गराई उस्तै ढिलासुस्तीपूर्ण भएको भन्दै संघ र प्रदेश सरकार बिरुद्ध स्थानीय सरकार आन्दोलनमा उत्रनुको बिकल्प नभएको उनले बताए ।

नगर प्रमुख खत्रीले सरकारका सम्बन्धित निकायहरूलाई पटकपटक ध्यानाकर्षण गराउँदै आइरहे पनि समस्याको समाधान गर्न चासो नदेखाइएको जानकारी दिए । जनताको चासो र मागको अनादर गरेर सरकारले स्वयं जनआक्रोश निम्त्याउने काम गरेको उनको भनाइ छ । स्थानीय सरकार जनतासंग प्रत्यक्ष जोडिने सरकार भएकोले स्थानीयको पिडा टुलुटुलु हेरेर बस्न नसक्ने नगर प्रमुख खत्रीले प्रष्ट पारेका छन् ।

सडकको निर्माण सम्पन्न नभएसम्म भ्रमण वर्ष सफल नहुने भन्दै उनले सरकारसंग चेतावनीपूर्ण अपिल गरे, ”यो वर्षमै हाम्रा सडक बनुन, हैनभने हामी सिंहदरवार घेर्छौं ।”

कार्यक्रममा चाँगुनारायण-६ नगरकोट क्षेत्रका वडाध्यक्ष धनबहादुर तामाङ्गले नगरकोटको पर्यटनलाई पुन:ब्राण्डिङ्ग गर्नुपर्ने धारणा व्यक्त गरे । कुनैबेला सूर्योदयको लागि प्रख्यात नगरकोटमा उपत्यकाको वायु प्रदुषणका कारण उत्पन्न तुवालोको असर परिरहेको जानकारी दिंदै उनले नगरकोटलाई पुन: ब्राण्डिङ्ग गर्न भ्रमण वर्षले काम गर्ने बताए ।

चाँगुनारायण नगरपालिकाले आगामी वर्ष २०८२ लाई नगरकोट भ्रमण वर्ष घोषणा गरेको छ । भ्रमण वर्षका लागि करिब ५ करोड रुपैयाँ खर्च हुने अनुमान गरिएको छ भने कम्तिमा १ लाख बाह्य पर्यटक भित्राउने लक्ष छ । नगरपालिकाले बाह्य भन्दा आन्तरिक पर्यटकलाई आकर्षण गर्ने नीति लिए अनुरुप दैनिक २० हजार पर्यटक बस्न सक्ने गरी आवश्यक व्यवस्था मिलाएको छ ।

नेपाल प्रेस सोसाइटीका अध्यक्ष उपेन्द्र केसीको अध्यक्षतामा सम्पन्न कार्यक्रमको संचालन महासचिव केशव लुइँटेलले गरेका थिए । पत्रकार रोशन थापाले विषय बस्तु उठान गरेको सो कार्यक्रममा नेपाल पत्रकार महासंघ भक्तपुरका सचिव संजीप घिमिरे शुभचिन्तक र सल्लाहकार रमेश गिरीको समेत आतिथ्यता रहेको थियो । कार्यक्रममा १ दर्जन बढी पत्रकार सहभागी रहेका थिए ।