भक्तपुर, १३ पुस २०८१भक्तपुर नगरपालिकाका पूर्व वडाध्यक्ष एवं नेपाल मजदुर किसान पार्टीका नेता कुमार चवालको निधन भएको छ । ६१ वर्षको उमेरमा शनिबार उनको असामयिक निधन भएको हो ।
चवाल १४ वर्षकै उमेर देखि नेमकिपाको विद्यार्थी संगठनमा आवद्ध रही संगठित भएका थिए । बाली काट्ने आन्दोलन लगायत विभिन्न आन्दोलनमा सरिक भइ जेलजीवन समेत बिताएका चवाल क्रान्तिकारी नेता थिए । पन्चायतकालमा मात्र नभई प्रजातन्त्र प्राप्ति पछि राजाको प्रत्यक्ष शासनको बेलामा पनि जनबिरोधी विधेयकको बिरोध गर्ने क्रम्मा उनी जेल परेका थिए । २०६२-६३ को आन्दोलनमा पनि उनी सक्रियतापूर्वक सहभागी भए ।
२०५४ सालमा तत्कालीन १२ नम्बर वडाको अध्यक्ष रहेका चवाल अघिल्लो कार्यकालमा ५ नम्बर वडाको वडाध्यक्ष निर्वाचित भई जनसेवामा जुटेका थिए । पछिल्लो समय मृगौलामा समस्या भएपछि उनको मृगौला प्रत्यारोपण गरिएको थियो र उनले यो कार्यकालमा जनप्रतिनिधि बन्न उम्मेदवारी दिएका थिएनन् । प्रतिकुल स्वास्थ्यका बाबजुद उनी समाजसेवामा भने तल्लीन नै देखिन्थे ।
नेमकिपाका कपार्टी सचिव एवं प्रतिनिधि सभा सदस्य प्रेम सुवाल, केन्द्रीय सदस्य एवं नगर प्रमुख सुनिल प्रजापति लगायतले चवालको पार्थिव शरीरमा कम्युनिस्ट पार्टीको झन्डा ओढाएर सम्मान प्रकट गरेका थिए । उनको निधनले पार्टीलाई अपूरणीय क्षती पुगेको नेमकिपाका जिल्ला अध्यक्ष सुरेन्द्रराज गोसाइँले बताएका छन् । दिवङ्गत चवालका १ छोरा र ४ छोरी छन् ।