भक्तपुर, १८ पुस २०८१प्रेस सेन्टर नेपालको चाँगुनारायण नगरपालिका शाखाले दोश्रो अधिवेशन सम्पन्न गरेको छ । अधिवेशनले दोस्रो कार्यकालका लागि पनि अध्यक्षमा आकाश गजुरेललाई नै दोहोर्याएको छ ।
बिहीबार सम्पन्न अधिवेशनबाट आकाशको अध्यक्षतामा ११ सदस्यीय नयाँ कार्यसमिति निर्वाचित भएको हो । सेन्टरको नयाँ बिधान बमोजिम ३ सदस्यीय पदाधिकारी निर्वाचित भएका नवनिर्वाचित अध्यक्ष आकाश गजुरेलले जनाएका छन् । जसअनुसार अधिवेशनले सचिवमा सुनिल दाहाल र कोषाध्यक्षमा उपासना थापालाई निर्वाचित गरेको उनले जानकारी गराए ।
कार्यसमिति सदस्यहरुमा भने मिनाल कार्की, सुप्रीम रोकाया, साहिल कार्की, बसन्ती क्षेत्री, रोहन ठकुरी, हिक्मत बुढा, मिथुन पराजुली र दीक्षा खड्का रहेका बताइएको छ ।
अधिवेशनलाई सम्बोधन गर्दै नेकपा(माओवादी केन्द्र)का चाँगुनारायण नगर अध्यक्ष नरेश खड्काले पत्रकारहरुले जनतालाई सही सूचना दिनुपर्नेमा जोड दिए । सूचना प्रविधिको बिकास र सामाजिक सन्जालको ब्यापकतासंगै आम मानिसहरु गलत सूचनाको सिकार भैरहेका भन्दै उनले आम जनतालाई सही, सत्य र तथ्यपूर्ण समाचार पस्कनु प्रेस सेन्टरमा आवद्ध पत्रकारको दायित्व भएको बताए । परिवर्तनलाई सस्थागत गर्न, बिकास र सुशासनको जग बसाल्न तथा भ्रष्टाचार नियन्त्रण गर्न आफ्नो पार्टीले गरेका कामबारे जनतालाई थाहा दिन उनले आग्रह गरेका थिए ।
सो अवसरमा प्रेस सेन्टर भक्तपुरका जिल्ला अध्यक्ष संजीप घिमिरे शुभचिन्तकले देशमा स्थानीय सरकारको सपना देख्ने पहिलो संगठन हुनुको नाताले प्रेस सेन्टर पालिका शाखा गठन गर्नेपनि पहिलो पत्रकार संगठन बनेको बताए । गाउँमा आइपुगेको सिंहदरवारप्रति स्थानीयको पहुँच बढाउनु र पालिकालाई जनमुखी बनाइरहन खबरदारी गर्नु पालिका शाखाको पहिलो कर्तब्य भएको उनको भनाइ छ ।
कार्यक्रममा प्रेस सेन्टर नेपालका उपत्यका प्रदेश सदस्य बाबुराम दाहाल, जिल्ला सचिव मदन ढुंगाना र कोषाध्यक्ष निराजन सिलवाल लगायतको समेत आतिथ्यता रहेको थियो । शनिबार हुने जिल्ला अधिवेशनका लागि प्रेस सेन्टर पालिका अधिवेशनमा जुटेको जिल्ला सचिव मदन ढुंगानाले जनाएका छन् । शुक्रवार बाकी पालिकाको पनि अधिवेशन सम्पन्न हुने उनले बताए ।