भक्तपुर, २३ पुस २०८१नेपाल पत्रकार महासंघ भक्तपुर जिल्ला शाखा स्थापनाको २८ वर्ष पुगेको छ । २८ वर्ष अघि आजकै दिन जिल्ला शाखाले मान्यता पाएको थियो ।
पत्रकार रमेश खड्का नेपाल पत्रकार महासंघ जिल्ला शाखा भक्तपुरको संस्थापक अध्यक्ष हुन् । उनी धरहरा टाइम्स साप्ताहिकका सम्पादकको रुममा अझै क्रियाशील रहेका छन् । त्यसयता बिकल श्रेष्ठ, नारायणसुन्दर किलम्बु, अमर भुजू, पुष्कर बुढाथोकी र जगत प्रजापति हुँदै हाल सुन्दर सिल्पकारको नेतृत्वमा भक्तपुरको पत्रकार महासंघ रहेको छ ।
महासंघ स्थापना दिवस मनाउन आज एक औपचारिक कार्यक्रम आयोजना गरिएको जिल्ला शाखा भक्तपुरका सचिव दीपक ढुङ्गानाले जानकारी दिएका छन् । सूर्यविनायकको गपलीस्थित भक्तपुर पार्टी भेन्यूमा अपराह्न साढे १ बजे हुने स्थापना दिवसमा बागमती प्रदेश सरकारका स्वास्थ्य मन्त्री किरण थापा र प्रतिनिधि सभा सदस्य दुर्लभ थापा लगायतको आतिथ्यता रहने उनले बताए ।
विगतमा स्थापना दिवसका दिन शाखाले पत्रकारलाई विभिन्न पुरस्कार प्रदान गर्ने गरेको भएपनि यसपटक नयाँ नेतृत्व पदस्थापन भएको एक साता मात्रै भएको कारण सो कार्य भने गर्न नसकिने सचिव ढुङ्गानाले जानकारी दिए । भक्तपुर पार्टी भेन्यूमा शुभकामना आदानप्रदान गरी स्थापना दिवस मनाइने कार्यक्रम रहेको उनले बताएका छन् ।