भक्तपुरको मध्यपुर थिमि-२ सानोथिमिस्थित दिव्यश्वरी प्लानिङमा भएको सवारी दुर्घटनामा मोटरसाइकलमा सवार महिलाको ज्यान गएको छ । गत सोमबार क्षमादेवी ग्रुपको गोदाम नजिक मोटरसाइकल र कार ठक्कर खाँदा दुर्घटना भएको थियो ।

ज्यान गुमाउने महिला भोजपुरको पात्लेपानी गाउँपालिका- ६ घर भई पेप्सिकोला बस्ने २३ वर्षिया सपना राई रहेकी छन् । उपचारका क्रममा बुधवार साँझ उनको निधन भएको प्रहरीले पुष्टि गरेको हो । काठमाडौ मेडिकल कलेज सिनामंगलमा उपचारको क्रममा सपनाको ज्यान गएको जिल्ला प्रहरी परिसर भक्तपुरका निमित्त सूचना अधिकारी प्रहरी निरीक्षक टेकेन्द्र शर्मा पौडेलले जानकारी दिएका हुन् ।

दुर्घटनामा घाइते भएकी उनकी ३ वर्षिया छोरी ईश्वरी राई डिस्चार्ज भैसकेकी प्रहरीको भनाइ छ । दुर्घटनामा संलग्न दुवै सवारी साधन र कार चालक रामेछाप सुनापाती गाउँपालिका–१ घर भई हाल बुढानिलकण्ठ बस्ने ३४ वर्षिय कृष्ण प्रसाद गौतमलाई प्रहरी वृत्त थिमिमा राखी थप अनुसन्धान भइरहेको प्रहरी निरीक्षक टेकेन्द्र शर्मा पौडेलले बताएका छन् ।