भक्तपुर, १३ माघ २०८१नेपाली कांग्रेसका महामन्त्री गगनकुमार थापाले प्रधानमन्त्रीले राम्रो काम गर्न नसकेका खुलासा गरेका छन् । प्रधानमन्त्रीलाई चुनौती दिंदै उनले आफू प्रधानमन्त्री भए राम्रो काम गरेर देखाउने दाबी समेत गरे ।
आइतबार भक्तपुरको बालकोटमा मीनकुमारी राणा प्रतिष्ठानको कार्यक्रमलाई सम्बोधन गर्दै पूर्व मन्त्री समेत रहेका कांग्रेसका महामन्त्री थापाले भने, ‘‘यति कुरा दावाका साथ भन्नसक्छु कि अहिलेका प्रधानमन्त्रीको ठाउँमा प्रधानमन्त्री बनाइने हो भने धेरै राम्ररी काम गरेर देखाउँछु ।” आजै प्रधानमन्त्री नियुक्ति गरे देश चलाउँने तरीका सिकाइदिने उनको दावी छ ।
प्रधानमन्त्री भएर देश बनाउने भिजन भएकै कारण आफू कांग्रेस संसदीय दलको नेता बन्न चाहेको पनि उनले खुलासा गरेका छन् । प्रधानमन्त्री भैसकेका कुनैपनि नेताबाट देश नबन्ने उनको जिकिर छ । युवा पुस्ता प्रधानमन्त्री नबनी देश नबन्ने उनले बताए ।
प्रतिनिधि सभा सदस्य समेत रहेका कांग्रेस महामन्त्री थापाले राज्यले नागरिकलाई देशमै राख्नपर्नेमा जोड दिए । देशमै आत्मसम्मानका साथ् बस्ने वातावरणका लागि राज्यले योजना अघि सार्नुपर्ने उनको भनाइ छ ।
सो अवसरमा उनले मीनकुमारी राणा प्रतिष्ठानले निर्माण गरेको स्व मीनकुमारी राणाको प्रतिमा अनावरण पनि गरे ।
कार्यक्रममा प्रतिनिधि सभा सदस्य एवं नेपाली काँग्रेस भक्तपुर सभापति दुर्लभ थापाले स्व मीनकुमारी राणाको व्यक्तित्वबारे प्रकाश पार्दै प्रतिष्ठानले समाजसेवामा पुर्याइरहेको योगदानको प्रशंसा गरे । कार्यक्रममा नेपाली कांग्रेस भक्तपुरका नेताकार्यकर्ताको उपस्थिति थियो ।
त्यस्तै प्रतिष्ठानले हरेक वर्ष प्रदान गर्दै आएको तीन विधाका पुरस्कार र एक विद्यालयको छात्रवृत्ति पनि प्रदान गरिएको प्रतिष्ठानका महासचिव रवि राणाले जानकारी दिएका छन् ।
