भक्तपुर, १४ माघ २०८१भक्तपुर । मुटु रोगको उपचार गरिरहेका पत्रकार प्रेम प्रजापतिलाई नेपाल पत्रकार महासंघ भक्तपुर शाखाले आर्थिक सहयोग गरेको छ ।
प्रजापति निवास पुगेर उनको श्रीमतीलाई शाखाका अध्यक्ष सुन्दर सिल्पकारले सोमबार २९ हजार रुपैया सहयोगस्वरुप हस्तान्तरण गरेका सचिव दीपक ढुंगानाले जानकारी दिए ।
शाखाको मातहतमा रहेको पत्रकार कल्याण कोषबाट १० हजार तथा विभिन्न सञ्चारकर्मीबाट संकलित १९ हजार गरी कूल २९ हजार हस्तान्तरण गरिएको सचिव ढुंगानाले बताएका छन् ।
पत्रकार प्रजापतिलाई शाखाले आर्थिक सहयोग गर्न पाउँदा अध्यक्ष सुन्दर सिल्पकारले सन्तोष ब्यक्त गरे । थप रकम उठ्ने क्रममा रहेको र आगामी दिनहरुमा हस्तान्तरण गर्दै जाने उनले बताएका छन् । नेपाल पत्रकार महासंघ केन्द्र र प्रदेश कार्यालयमा पनि प्रजापतिको उपचारका लागि आर्थिक सहयोगको माग गरिएको अध्यक्ष सिल्पकारले जानकारी दिए ।
दुई महिना अघि हृदयघात भई मुटुको शल्यक्रिया गरेका प्रजापति हाल निवासमै आराम गरी राखेका छन् । उनको गत माघ ४ गते शहीद गङ्गालाल ह्र्दय रोग निवारण केन्द्र काठमाडौमा शल्यक्रिया गरिएको उनकी श्रीमतीले जानकारी दिइन् । महासंघ सदस्य रहेका पत्रकार प्रजापति राससका भक्तपुर संवाददाता हुन् । भक्तपुर पोस्ट उनको शिघ्र स्वास्थ्य लाभको कामना गर्दछ ।