दुई पाङ्ग्रे सवारी चालकलाई ट्राफिक प्रहरीले पढाउन थालेको छ । आइतबारबाट ट्राफिक प्रहरीले बाटोमै रोकेर दुई पाङ्ग्रे सवारी चालकलाई पठाउन शुरु गरेको हो।

दुई पाङ्ग्रे सवारी साधन बढीमात्रामा दुर्घटना भएकोले ट्राफिक प्रहरीले बाटोमै सवारी रोकेर सवारीधनीहरुलाई दुई मिनेटको सचेतना कक्षा दिन शुरु गरेको भक्तपुर ट्राफिक प्रहरी प्रमुख रहेका प्रहरी निरीक्षक प्रदिप खत्रीले प्रष्ट पारे ।

ट्राफिक प्रहरी कार्यालय भक्तपुरले आइतवार भक्तपुरको दुधपाटीमा दुई पाङ्ग्रे सवारी साधनलाई बाटोमै रोकेर राखेपछि मानिसमा कौतुहलता छाएको थियो । पछि उनीहरूलाई दुई मिनेट ट्राफिक नियम पालना सम्वन्धी सचेतना कक्षा लिएर छाडिएको थियो । यो सचेतना कक्षालाई अभियानकै रुपमा १० दिन सम्म विभिन्न स्थानमा संचालन गरिने पनि जिल्ला ट्राफिक प्रहरी प्रमुख खत्रीले जानकारी दिएका छन् ।

दुईपाङ्ग्रे सवारी चालकलाई सवारी चलाउँदा मोवाइल फोन प्रयोग नगर्न, मापसे र लापसे गरि सवारी नचलाउँन , लेन अनुसासन कायम गर्न , ट्राफिक बत्ति र इसाराको पालना गर्न तथा तीब्र गतिमा सवारी नचलाउँन लगायतका विषमा सचेत गराइने जिल्ला प्रहरी परिसर भक्तपुरका प्रमुख रहेका एसपी माधव बुढाथोकीले बताएका छन् । यसले सडक दुर्घटना न्यूनीकरणमा सहयोग पुग्ने उनले बिश्वास समेत व्यक्त गरे ।