भक्तपुर, २० माघ २०८१भक्तपुर । प्राविधिक शिक्षा तथा व्यवसायिक तालिम परिषद् (सिटिइभिटी) का उपाध्यक्ष प्राडा ओमप्रसाद बरालको नियुक्ति बदर भएको छ । आइतबार सर्वोच्च अदालतले उनको नियुक्ति बदर हुने आदेश दिएको हो ।
सर्वाेच्चले जारी गरेको उत्प्रेषणको आदेशमा बरालको योग्यता नपुग्ने ठहर गरिएको छ । प्राविधिक शिक्षा तथा व्यवसायिक तालिमको क्षेत्रमा बरालसंग आवश्यक अनुभव नभएको भन्दै सर्वोच्चमा रिट परेको थियो । टैलेन्द्र आचार्यले दायर गरेको रिटमा प्रधान न्यायाधीश प्रकाशमानसिंह राउत र नृपध्वज निरौलाको इजलासले उत्प्रेषणको आदेशबाट नियुक्ति बदर गरिदिएको हो । नियुक्तिका लागि आवश्यक प्राविधिक तथा ब्यवसायिक शिक्षाको क्षेत्रमा १५ वर्षको अनुभव प्राडा बरालसंग नभएकोले नियुक्ति बदर भएको आदेशमा भनिएको छ ।
प्राडा बराललाई गत मंसिर ६ गते मन्त्रिपरिषद्को बैठकले सिटिइभिटीको उपाध्यक्ष नियुक्त गरेको थियो ।
शिक्षा, बिज्ञान तथा प्रविधि मन्त्री विद्या भट्टराईको गृह जिल्ला कास्कीका भएकोले उनकै जोड्बलमा प्राडा बरालको नियुक्ति भएको ननस्टप श्रोतले बताएको छ । उपाध्यक्षमा आवेदन भरेका र प्रधानमन्त्री केपी ओलीको आश्वासन समेत पाएका झापाका टैलेन्द्र आचार्य यो नियुक्तिबाट असन्तुष्ट थिए । उनी सिटिइभिटीका निर्देशक समेत हुन । असन्तुष्ट टैलेन्द्र प्राडा बरालको नियुक्ति बिरुद्ध सर्वोच्च अदालत पुगेपछि बरालको नियुक्ति अवैधानिक देखिएको र अन्ततः बदर भएको हो ।
उपाध्यक्षमा १ दर्जन बढीले आवेदन दिएका थिए । अब फेरि नयाँ प्रक्रिया शुरु हुने श्रोतले जानकारी दिएको छ । ननस्टप खबरबाट