भक्तपुर, २८ माघ २०८१भक्तपुरको मध्यपुर थिमि नगरपालिका-७ नगदेशमा धार्मिक-ऐतिहासिक पुलु:किसि जात्रा सम्पन्न भएको छ । बाह्र वर्षदेखि बन्द यो जात्रा यस वर्ष स्थानीय युवाहरूको सक्रियतामा आइतबार राति सम्पन्न भएको हो ।
श्री स्वस्थानी ब्रतकथामा आधारित पुलुकिसी जात्रा हरेक वर्ष नगदेशमा हुँदै आएको भए पनि बिगत १२ वर्षदेखि खर्च व्यवस्थापन गर्न नसकेर जात्राले निरन्तरता पाउन सकेको थिएन । नगदेश लाय्कु दरवार समितिका सदस्य भाइजन बाडेले यस वर्ष धुमधामले पुलुकिसि जात्रा प्रदर्शन गर्न पाउँदा सन्तोष व्यक्त गरे ।
काठमाडौ र भक्तपुर नगरमा पुलुकिसि जात्रा इन्द्रजात्राको सन्दर्भमा गरिन्छ भने नगदेशमा स्वस्थानी ब्रत कथाको आधारमा गरिदै आएको छ । माघ महिनाभर वाचन हुने श्री स्वस्थानी ब्रतकथा अनुसार हात्तीले ब्राह्मण पुत्र नवराजलाई राजा छान्ने कथालाई यस पुलुकिसी जात्राले प्रदर्शनीमार्फत जीवन्तता दिदै आएको देखिन्छ ।
राजा छानिएको खुसियालीमा भोजभतेर गर्दै नगदेशबासीहरुले यो जात्रा मनाउने गरेको स्थानीय एवं जात्रा ब्यवस्थापक बिनोद कोजू बताउँछन् । विशेषगरी नगदेशका किसान, महर्जन समुदायले यो पर्व मनाउँदै आएका छन् ।
सुयोग्य बरबधुको मनोकाक्षां राख्दै युवापिढीहरुले पनि ब्रत बस्ने र पर्व मनाउने परम्परा भएकोले युवा पुस्ताको यस् पर्वमा आकर्षण रहेको पत्रकार बाबुकाजी साछेँ श्रेष्ठले बताए ।
हरेक वर्ष भीमाद्वादर्शीको दिन यो जात्रा देखाउने परम्परा रहेको छ । अबका वर्षमा जात्रालाई आर्थिक अभाव हुन नदिने नगरपालिकाले जनाएको छ । जात्राको निरन्तरतामा नगरपालिकाले सहयोग गर्ने नगर प्रमुख सुरेन्द्र श्रेष्ठ र उपप्रमुख बिजय कृष्ण श्रेष्ठले प्रतिवद्धता प्रकट गरेका छन् ।